विराटनगर । जिल्ला खेलकुद विकास समिति मोरङका कार्यालय प्रमुख राजन पोखरेलमाथि अपशब्द प्रयोग गर्दै हातपात गरेको आरोपमा पक्राउ विवादित खेलकुदकर्मी रामबहादुर लिम्बूलाई हिरासतमा राखेर अनुसन्धान जिल्ला प्रशासन कार्यालय मोरङले ७ दिनको म्याद थप गरेको छ।
असार १५ गते विराटनगरस्थित शहिद रंगशालाबाट पक्राउ परेका लिम्बूलाई अभद्र व्यवहारमा अनुसन्धान गर्न जिल्ला प्रशासन कार्यालयले ७ दिनको म्याद थप गरेको हो।
लिम्बूलाई पक्राउ परेको मिति असार १५ गते देखि लागू हुने गरि ७ दिनको म्याद थप गरिएको जिल्ला प्रहरी कार्यालय मोरङका निमित्त प्रवक्ता प्रहरी निरीक्षक हेमराज ओलीले जानकारी दिए ।
कार्यालय प्रमुख पोखरेलमाथि १५ औँ राष्ट्रपति रनिङ शिल्ड छनोट प्रतियोगितामा कराते खेलाडी छनोटको विषयमा कार्यालयमै पुगेर हातपात गरेको आरोपमा लिम्बूलाई कार्यालय प्रमुख पोखरेलको जाहेरीको आधारमा पक्राउ गरिएको निमित्त प्रवक्ता ओलीले बताए ।
घटना पछि केही समय फरार रहेको लिम्बू कार्यालय प्रमुख पोखरेल लगायतका कर्मचारीसँग छलफल गर्न शहिद रंगशाला आएको बेला प्रहरीले नियन्त्रणमा लिएको थियो।
लिम्बूलाई पक्राउ गर्ने माग गर्दै मोरङ जिल्ला खेलकुद कर्मचारी संघले रंगशालामा ताला लगाउने देखि खेलकुद समितिको कार्यालयमा तालाबन्दी समेत गरेको थियो।
