विराटनगर । नेकपा एमाले विराटनगर महानगरको दोस्रो अधिवेशन बैशाख २ र ३ गते हुने भएको छ ।
अधिवेशन सञ्चालनका लागि आज बसेको महानगर कमिटी सचिवालय बैठकले ९ वटा समिति बनाएको छ ।
समितिले अधिवेशन सम्पन गर्न सहजिकरण गर्नेछ ।
अधिवेशनका लागि चैत २८ गते एकैदिन एकै समयमा भूगोलबाट प्रतिनिधि छनोट गरिनेछ ।
बैठकले जनसंगठनहरुको प्रतिनिधि चैत २९ गते छनोट गर्ने गर्ने महानगरका सचिव बलराम गिरीले बताए ।
अधिवेशन सञ्चालनका लागि महानगरका अध्यक्ष रोहित कोइरालाको संयोजकत्वमा महानगर कमिटी तथा वडा कमिटीका अध्यक्ष र सचिव रहनेगरी २५१ सदस्यीय मूल व्यवस्थापन समिति गठन गरिएको छ ।
नगर सचिव बलराम गिरीको संयोजकत्वमा प्रतिनिधि व्यवस्थापन उपसमिति गठन गरिएको छ ।
प्रवक्ता राम पोखरेलको संयोजकत्वमा प्रचार–प्रसार उपसमिति गठन भएको छ ।
मनोजविक्रम साह संयोजक र सहसंयोजकमा सीएम श्रेष्ठ रहेको आर्थिक उपसमिति गठन भएको छ ।
प्रकाश पोखरेलको संयोजकत्वमा स्वयंसेवक उपसमिति गठन गरिएको छ ।
राजनितिक तथा सांगठनिक प्रतिवेदन लेखन उपसमितिको संयोजक अध्यक्ष कोइराला र अतिथि सत्कार उपसमितिको संयोजकमा उपाध्यक्ष सुनिता श्रेष्ठ छिन् ।
सचिवालय सदस्य राम पाण्डेको संयोजकत्वमा स्वास्थ्य उपसमिति गठन भएको छ ।
खाद्यान्न तथा आवास उपसमितिको संयोजकमा भोला बराल छन् ।
बैठकपछि अध्यक्ष कोइरालाले अधिवेशनलाई भव्यताका साथ सम्पन्न गर्न महानगरको सिंगो टिमलाई नै विभिन्न जिम्मेवारीका साथ परिचालन गरिएको जानकारी दिए ।
महानगर अधिवेशनमा भूगोलबाट हरेक १५ जना संगठित सदस्य बराबर १ जना हुनेगरी प्रतिनिधि चयन हुनेछन् ।
३ जना प्रतिनिधि बराबर एक जना महिला अनिवार्य गरिएको छ ।
कुल प्रतिनिधिको २० प्रतिशत युवाको प्रतिनिधित्व अनिवार्य गरिएको छ भने सीमान्तकृत, दलित, मुस्लिम, अल्पसंख्यक, मारवाडी प्रतिनिधित्व समेत सुनिश्चित गरिएको छ ।
सचिवालय बैठकलाई सम्बोधन गर्दै नेकपा एमाले कोशी प्रदेश कमिटी सचिवालय सदस्य तथा महानगरका इन्चार्ज पर्शुराम बस्नेतले नेकपा एमालेलाई एकताबद्ध बनाएर लैजानुपर्ने बताए ।
पार्टी भित्र कुनै गुट नरहेको बताउँदै उनले सर्वसम्मत नेतृत्व चयन गर्नुपर्नेमा जोड दिए ।
‘नेकपा एमालेको लोकप्रियताबाट छटपटिएकाहरुले पार्टी र नेताहरुमाथि प्रहार गर्ने गरिरहेका छन्,’ उनले भने,‘त्यसको हामी सबैले एकमतका साथ प्रतिवाद गर्नु अहिलेको आवश्यकता हो ।’
नेकपा एमाले मोरङका सचिव सोमराज थापाले महानगरको दोस्रो अधिवेशनले अभूतपूर्व एकताको सन्देश दिने विश्वास व्यक्त गरे ।
एमाले नेतृ तथा विराटनगर महानगरकी उपप्रमुख शिल्पा निराला कार्कीले पार्टीलाई अघि बढाउनुपर्ने बताइन् ।
