विराटनगर । कोशी प्रदेशको राजधानी विराटनगरमा चौथो संस्करणको इक्वालिटी कप क्रिकेट हुने भएको छ । विराटनगर महानगरपालिका- ६ स्थित मारिलिबोन विराटनगर ज्वाला क्रिकेट ग्राउन्डमा सोमबार (भोलि) देखि चार दिनसम्म इक्वालिटी कप क्रिकेट हुन लागेको हो ।
आयोजक नेपाल क्रिकेट फाउन्डेसनले आइतबार पत्रकार सम्मेलनको आयोजना गर्दै भोलिदेखि चैत २१ गतेसम्म कोशी र मधेश प्रदेशका चार टोलीको सहभागितामा उक्त प्रतियोगिता हुने जानकारी दिएको हो ।
फाउन्डेसनका संयोजक मन्दीप साहले प्रतियोगितामा कोशीका मोरङ र इलाम तथा मधेश प्रदेशका सिरहा र सप्तरी गरी चार टोलीको सहभागिता रहने जानकारी दिए ।
उनका भुइँतहमा क्रिकेट प्रवर्द्धन गर्न, महिला क्रिकेटको विकास गर्न र लैंगिक समानता कायम गर्ने प्रयासस्वरूप हुने प्रतियोगिताअन्तर्गत दिनमा दुई खेल हुनेछन् ।
आइसिसीको नियमअनुसार टी-२० ढाँचामा हुने प्रतियोगिताको उद्घाटन सत्र विराटनगर महानगरपालिका प्रमुख नागेश कोइरालाको प्रमुख आतिथ्यता र कोशी प्रदेश क्रिकेट संघका अध्यक्ष सर्वजित पाण्डे र मोरङ जिल्ला क्रिकेट संघका अध्यक्ष सादबाबु कुरेशीको विशिष्ट आतिथ्यतामा हुने बताइएको छ ।
फाउन्डेसनकी बोर्ड सदस्य स्नेहा गुवाजुका अनुसार नव प्रतिभा पहिचानलाई मद्दत गर्ने लक्ष्यका साथ आयोजना हुन लागेको प्रतियोगिताले यसअघि नै केही खेलाडी उत्पादनमा टेवा पुर्याएको छ ।
अघिल्ला संस्करणबाट मोरङमा सानु राजवंशी, निरु राजवंशी (काजल) र पूर्णिमा राजवंशीले ठुला प्रतियोगिता खेल्न पाएको उनले सुनाइन् ।
करिब ६ लाख खर्च अनुमान गरिएको उक्त प्रतियोगिताअन्तर्गत उद्घाटन खेल बिहान ९:३० बजे हुनेछ, जसमा इलाम र सप्तरी भिड्नेछन् । भोलि नै १:३० बजे हुने अर्को मोरङ र सिरहाले प्रतिस्पर्धा गर्नेछन् ।
