काठमाडौं । नेपालले वुमन्स डे टी–२० अन्तर्राष्ट्रिय क्रिकेट प्रतियोगितामा घरेलु टोली युगान्डामाथि रोमाञ्चक जित निकालेको छ ।
आइतबार सम्पन्न खेलमा नेपाल एक विकेटले विजयी भएको हो ।
नेपाल पहिलो खेलमा नामिबियासँग ६ विकेटले पराजित भएको थियो ।
युगान्डाले भने हङकङलाई आठ विकेटले पराजित गरेको थियो ।
युगान्डाले प्रस्तुत गरेको ७६ रनको लक्ष्य नेपालले अन्तिम बल बाँकी रहँदा नौ विकेट गुमाउँदै पूरा गरेको हो ।
नेपालकी ओपनर सना प्रविणले सर्वाधिक १७ रन बनाइन् ।
उनले यही खेलमार्फत सिनियर टोलीमा डेब्यु गरेकी हुन् ।
नेपाली यु–१९ महिला टोलीलाई एसिया कप र आइसिसी यु–१९ विश्वकप खेलाएकी ओपनरलाई यसैपल्ट राष्ट्रिय टोलीमा समावेश गरिएको थियो ।
नामिबियासँग पहिलो खेलमा ६ विकेटले हार्दा उनी बेन्चमा थिइन् ।
तर, अर्को खेलमै उनले डेब्यु गर्ने अवसर प्राप्त गरेकी हुन् ।
उनी नेपाली महिला टोलीबाट डेब्यु गर्ने ३८औं खेलाडी हुन् ।
पूजा महतो १६ र रुविना क्षेत्री बेलबासेले १९ रन बनाउँदा अन्यले दोहोरो अंकमा रन बनाउन सकेनन् ।
त्यसअघि एन्टेब्बे क्रिकेट ओभलमा पहिला ब्याटिङ थालेको युगान्डाले निर्धारित २० ओभरमा सात विकेट गुमाउँदै ७६ रनको योगफल तयार गरेको थियो ।
युगान्डाकी इम्याक्युलेट नकिसुयीले सर्वाधिक २२ रन बनाइन् ।
४० बल खेलेका उनले तीन चौका प्रहार गरिन् ।
स्टेफनी नाम्पीना १४ र मालिसा अरिओकोटले ११ रन बनाउँदा अन्यले राम्रो प्रदर्शन गर्न सकेनन् ।
नेपालकी पूजा महतोले तीन र कप्तान इन्दु बर्माले दुई विकेट लिइन्।
