विराटनगर । कोशी प्रदेशमा पहिलोपटक खेलकुद महोत्सव हुने भएको छ ।
कोशी प्रदेश खेलकुद विकास बोर्डले आगामी फागुन १३ देखि १८ गतेसम्म प्रथम संस्करणको कोशी प्रदेश खेलकुद महोत्सव आयोजना गर्न लागेको हो ।
आइतबार सामाजिक विकास मन्त्रालयमा पत्रकार सम्मेलनको आयोजना गर्दै बोर्डले महोत्सवको तयारी पूरा भएको जानकारी दिएको छ ।
प्रदेशका १४ जिल्लाका खेलाडीहरू सहभागी हुने यस महोत्सवमा एथलेटिक्स, कबड्डी, डोरीतान, सफ्ट टेनिस, कराते, तेक्वान्दो, बुद्धिचाल, बाघचाल, महिला फुटबल, महिला भलिबल र टेबलटेनिस गरी ११ खेल समावेश गरिएको छ ।
खेलकुद महोत्सवको उद्घाटन कोशी प्रदेश सभाका सभामुख अम्बरबहादुर विष्टले गर्ने छन् ।
मोरङ र झापा जिल्लाका विभिन्न खेल मैदानहरूमा प्रतियोगिता सञ्चालन हुने कोशी प्रदेश खेलकुद विकास बोर्डका सदस्य सचिव कृष्ण बस्नेत ‘पर्शुराम’ ले जानकारी दिए ।
उनले नियमित खेलकुद प्रतियोगिताले खेलाडीको प्रतिभामा निखार ल्याउने बताउँदै ‘खेल गति नै खेलाडीको प्रगति’ हो भन्ने मान्यताका साथ बोर्डले गतिविधि गर्दै आएको धारणासमेत व्यक्त गरे ।
करिब एक करोड ७९ लाख रुपैयाँ लागत अनुमान गरिएको यस प्रतियोगितामा बोर्डले एक करोड २० लाख रुपैयाँ व्यहोर्ने र बाँकी रकम प्रदेश सरकार, निजी क्षेत्र र खेलप्रेमीहरूको सहयोगबाट जुटाइने बताइएको छ ।
प्रदेशमा खेलकुद क्षेत्रलाई सक्रिय बनाउने र खेलाडीहरूलाई प्रोत्साहन गर्ने उद्देश्यले यो महोत्सव आयोजना गरिएको कोशी प्रदेश सामाजिक विकास मन्त्री पाँचकर्ण राईले जानकारी दिए ।
आगामी चैत्र तेस्रो साताबाट सुरु हुने दसौं राष्ट्रिय खेलकुदको तयारीस्वरूप महोत्सव गर्न लागिएको उनको भनाइ छ ।
बोर्डका अध्यक्षसमेत रहेका राईले कोशी प्रदेशमा नियमित खेल गतिविधि हुँदा यस्ता गतिविधिले कोशी प्रदेशलाई १०औं राष्ट्रिय खेलकुद प्रतियोगितामा अधिक पदक जित्न सहयोग पुग्ने बताए ।
राईले नियमित खेलकुद प्रतियोगिताले खेलाडीको जीवन निर्वाहमा समेत महत्वपूर्ण भूमिका खेल्ने भन्दै खेलाडीले खेलेरै जीवनयापन गर्न सक्ने अवस्था सिर्जना गर्न सबैपक्ष लाग्नु पर्ने धारणा व्यक्त गरे ।
खेलकुद विकास बोर्डले खेलाडी तथा आगन्तुकहरूको स्वागतका लागि विभिन्न स्थानमा स्वागतद्वार निर्माण गरेको छ ।
खेलकुद महोत्सवको समापन भने कोशी प्रदेशका मुख्यमन्त्री हिक्मतकुमार कार्कीले गर्ने कार्यक्रम रहेको छ ।
