विराटनगर । फुटबलको सर्वोच्च निकायले सन् २०३४ को पुरुष विश्वकप फुटबल साउदी अरबमा आयोजना गर्ने निर्णय गरेको छ ।
फिफा कांग्रेसले सन् २०३४ को विश्वकप फुटबल प्रतियोगिता आयोजनाको अधिकार साउदी अरबलाई दिने निर्णय गरेको हो ।
पछिल्लो समय घरेलु फुटबलमा ठुलो धनराशी खर्च गरिरहेको साउदीले पुरुष विश्वकप फुटबल आयोजनाको अधिकार पाएको हो ।
विश्वकप फुटबलका लागि यो देशले अब ११ वटा रंगशाला बनाउनुपर्ने छ । तर, अहिलेसम्म ती कुनै पनि रंगशाला तयार भइसकेका छैनन् ।
त्यसमध्येको एउटा रंगशाला नयाँ सहरमा हुनेछ । तर रोचक के छ भने त्यो सहर नै बन्न बाँकी छ ।
यस्तै, सन् २०३० को विश्वकपको आयोजना पोर्चुगल, मोरक्को र स्पेनले संयुक्त रुपमा आयोजना गर्ने भएका छन् ।
फिफा कांग्रेसले यस विषयमा औपचारिक निर्णय गर्दै आयोजनाको अधिकार तीन देशलाई सुम्पिएको हो ।
सन् २०२३ को अक्टोबरमा विश्वकप आयोजनका लागि खुल्ला दर्खास्त आह्वान गरिएको थियो ।
पालैपालो विश्वकप आयोजना गर्ने महादेशीय चक्र अनुसार सन् २०३० को विश्वकप युरोप र सन् २०३४ को विश्वकप एसियाली देशले सञ्चालन गर्ने पक्का भएको हो ।
सन् २०३० मा विश्वकप आयोजनाको सय वर्षसमेत पूरा हुँदैछ । सो अवसरमा अर्जेन्टिना, पाराग्वे र उरुग्वे समेत एक एक विश्वकप फुटबलअन्तर्गतको खेलको आयोजना गर्नेछन् ।
सन् १९३० यता हुँदै आएको विश्वकपको ट्रफी अहिलेसम्म युरोप र दक्षिण अमेरिकाले मात्र अहिलेसम्म विश्वकप ट्रफी उचालेका छन् । युरोपले १२ र दक्षिण अमेरिकी टिमले १० पटक विश्वकप जितेका छन् ।
सन् १९९८ मा विश्वकप खेल्ने टिमको संख्या २४ बाट ३२ बनाइएको थियो । पहिलोपटक सन् २०२६ मा भने ४८ राष्ट्रलाई सहभागी गराइन लागिएको छ ।
फिफाले ४८ राष्ट्रको विश्वकप गर्नुमा आर्थिक कारण पनि छ । विश्वकपमा जति धेरै राष्ट्र सहभागी भयो, फिफाको आम्दानी उति नै बढ्नेछ ।
