विराटनगर । प्रतिनिधिसभा सदस्य सुनील शर्मा सत्तापक्षकै सांसद भए पनि प्रतिपक्षीसरह प्रस्तुत हुन्छन् ।
सरकारविरुद्ध खरो प्रस्तुत हुँदै आएका शर्माले गृहमन्त्री रमेश लेखकको आलोचना गरेका छन् । आफ्नै पार्टीका गृहमन्त्रीसँग उनी गर्जिएका हुन् ।
काठमाडौंमा पत्रकार सम्मेलन गरेर शर्माले अहिलेसम्म जवी राईलाई पक्राउ नगरेको भन्दै गृहमन्त्री लेखकको आलोचना गरे ।
उनले अहिलेसम्म राईलाई किन नसमातेको भन्दै प्रश्न गरेका थिए ।
उनले भने, ‘हिजो हामी सरकारमा थिएनौँ, अहिलेको गृहमन्त्री हाम्रो प्रमुख सचेतक पनि हुनुहुन्थ्यो । उहाँले हामी सबैलाई सदनको अगाडि बोलाएर नाराजुलुस गर्न लगाउनुभयो । ह्वीप जारी गर्नुभयो । अनि हामीले नाराजुलुस गर्यौँ, जिवी राई खोइ ? किन पक्राउ गर्दैन ? भनेर । अनि आफू गृहमन्त्री भएपछि पक्राउ गर्नुपर्ने दायित्व उहाँको हो कि होइन ? किन पक्राउ नगरेको ?’
उनले जिवी राईसहित सबै सहकारी ठगीमा जोडिएका सबैलाई पक्राउ गरेर अदालतमा बुझाइदिन माग गरे ।
