विराटनगर । श्रीलंका राष्ट्रिय फुटबल टोलीकाे मुख्य प्रशिक्षकमा अब्दुल्लाह अल्मुताइरी नियुक्त भएका छन् । नेपाली टोली सम्हालिसकेका उनी यसअघि श्रीलंकाकाे अन्तरिम प्रशिक्षक थिए ।
एसिया कप प्लेअफको लागि उनलाई दुई खेलमा प्रशिक्षककाे जिम्मेवारी दिइएको थियो । उनको प्रशिक्षणमा श्रीलंकाले कम्बोडियासँग पहिलो खेल गोलरहित बराबरी खेलेको थियो ।
दोस्रो खेलमा भने पेनाल्टी सुटआउटमा ४–२ ले विजयी हुँदै श्रीलंका तेस्रो चरणमा प्रवेश गरेकाे थियाे ।
अल्मुताइरीले नेपाललाई सन् २०२१ को साफ च्याम्पियनसिपमा पहिलोपल्ट फाइनलमा पुर्याएका थिए ।
कतारको तलब खाएर नेपाली राष्ट्रिय पुरुष फुटबल टोलीलाई सिकाउन नेपाल आएका थिए, कुवेती अब्दुल्लाह अल मुताइरी ।
२०७७ चैत १८ गते एक वर्षका लागि नेपालको ‘कोच’ बनेका अल मुताइरीले २०७९ भदौ २६ गते जिम्मेवारी त्यागेको घोषणा गरे ।
अखिल नेपाल फुबटल संघ (एन्फा)ले दोस्रोपटक सम्झौता थपेको थियो । अल्मुताइरी र एन्फाबीच २०७८ कात्तिकमा तीन वर्षको लागि नयाँ सम्झौता भएको थियो ।
५२५ दिन नेपाली फुटबललाई सेवा गरेपछि अल्मुताइरीले सामाजिक सञ्जालमार्फत् आफ्नो कार्यअवधि टुंग्याएको घोषणा गरेका थिए ।
खेलाडी र समर्थकले औधि रुचाएको र नेपाल नै बस्ने मन हुँदाहुँदै पनि प्रशिक्षक अलमुताइरीले कुवेत फर्किने निधो गरेका थिए ।
यसको प्रमुख कारण थियो, अखिल नेपाल फुटबल संघ (एन्फा) भित्रको किचलो ।
साफ च्याम्पियनसिपको ३८ वर्षे लामो इतिहासमा नेपाललाई पहिलोपल्ट फाइनलमा पुर्याएका अल्मुताइरीसँग तत्कालीन वरिष्ठ उपाध्यक्ष पंकजविक्रम नेम्वाङको विवाद भएको थियो ।
राजीनामा दिँदा नेम्वाङकै नाम उल्लेख गरेका थिए, अलमुताइरीले । पछि छानबिन नभई उक्त विषय त्यतिकै टुंगियो । र, उनले नेपाल छोडे ।
नेपाली फुटबल टोलीले पहिलोपटक पाएको प्रो–लाइसेन्सप्राप्त प्रशिक्षक थिए, उनी । कतार फुटबल एसोसिएसनले एक वर्षका लागि अल्मुतारीलाई प्रशिक्षकको रूपमा पठाएको हो ।
जसअन्तर्गत उनले कतार फुटबल एसोसिएसनबाट मासिक तलब पाउँथे । तर, उनलाई एन्फाले बस्ने र खाने सुविधाको व्यवस्था गरेको थियो ।
अलमुताइरीको डेढ वर्षको बसाइमा उनी नेतृत्वको नेपालले १९ खेल खेल्दा पाँच खेलमा जित, र दुई खेलमा बराबरी खेल्यो ।
१२ खेलमा भने नेपालको नतिजा निराशाजनक रह्यो । तथापि, ती हारहरूमा हुने गोलान्तरमा भने व्यापक रूपमा फेरबदल आएका कारण उनी समर्थकको नजरमा परे ।
त्यसबाहेक अलमुताइरीले फुटबल विकासको लागि नेपाललाई आर्थिक सहयोग गर्न फिफा र एएएफसीलाई अपिल पनि गर्नेगरेका थिए ।
नेपाली फुटबल व्यावसायिक नभएकै कारण गुणस्तरीय फुटबल खेलाडी उत्पादन गर्न नसकेको उनको निष्कर्ष थियो ।
नेपाली खेल र खेलाडीलाई योगदान दिन रुचि भएका अलमुताइरी २०७८ मा वर्षकै उत्कृष्ट प्रशिक्षक घोषित भएका थिए ।
उनको कमान्डमा नेपाल पहिलोपटक एएफसी एसियन कप २०२३ प्रतियोगित छनोटअन्तर्गत तेस्रो चरणसम्म पुगेको थियो ।
त्यसैगरी, उनकै नेतृत्वमा गत वर्ष माल्दिभ्समा भएको १३औँ साफ च्याम्पियनसिपमा नेपालले फाइनल यात्रा तय गरेको थियो । तर, उपाधि भने जित्न सकेन ।
नेपाल आउनुअघि कुवेत र साउदी अरेबियाको कोचको भूमिका उनले निभाएका थिए ।
त्यसैगरी उनले कीर्गिस्तान यू–१६ टिमलाई २०१९ देखि २०२० सम्म एक वर्ष कोच गरेका थिए ।
नेपाली फुटबलका ‘गेमचेन्जर’ का रूपमा चिनिएका अलमुताइरीले दोस्रो पटक तीन वर्षका लागि सम्झौता भएको एक वर्ष पनि नपुग्दै नेपाल छोडे ।
अल्मुताइरी अफगानिस्तान र कुवेती क्लब अल जाहराको प्रशिक्षक हुँदै श्रीलंकाको प्रशिक्षकका रूपमा छन् ।
