विराटनगर । प्रतिष्ठित गोल्डेन फुट अवार्डका लागि टप-१० मनोनयन सूची सार्वजनिक भएको छ ।
सन् २०२४ का लागि दिइने ‘गोल्डेन फुट’ अवार्डका लागि अन्तिम मनोनयन सार्वजनिक भएको हो ।
मंगलबार १० खेलाडीलाई समेटेर मनोयनन सार्वजनिक गरिएको हो ।
‘गोल्डेन फुट’ अवार्ड एक अन्तर्राष्ट्रिय अवार्ड हो । यो हरेक वर्ष उत्कृष्ट प्रदर्शन गर्ने फुटबलरलाई दिइन्छ ।
अवार्डका लागि खेलाडीको व्यक्तिगत प्रदर्शन, क्लबको सफलता र राष्ट्रिय टोलीको सफलता तथा तथ्यांकलाई मुख्य आधार बनाइन्छ ।
त्यसैगरी, यो अवार्डका लागि खेलाडीको व्यक्तित्व र अन्य कुरा पनि हेरिन्छ । यो अवार्डलाई अन्तर्राष्ट्रिय फेयर अवार्डका रूपमा पनि लिइन्छ ।
त्यसैगरी, यो अवार्ड २८ वर्षभन्दा बढी उमेरका सक्रिय खेलाडीलाई मात्रै प्रदान गरिन्छ । मनोनयनमा परेका सबै खेलाडी २८ वर्षभन्दा बढीका हुन्छन् ।
मनोनयनमा परेका १० खेलाडीबाट अनलाइन भोटिङका आधारमा धेरै मत पाउन खेलाडीलाई अवार्ड प्रदान गरिन्छ । यसमा सबैले भोट दिन पाउँछन् ।
यो अवार्डका लागि यसपटक इन्टर मियामीका अर्जेन्टिनी फरवार्ड लियोनल मेस्सी र अल हिलालका ब्राजिलियन स्ट्राइकर नेयमार जुनियर परेका छन् ।
अल नासरबाट व्यावसायिक फुटबल खेलिरहेका पोर्चुगिज फरवार्ड क्रिस्टियानो रोनाल्डोले भने सन् २०१८ मै उक्त अवार्ड पाइसकेका छन् ।
यो अवार्ड एकपटक जितिसकेको खेलाडीलाई दोस्रोपटक दिइँदैन र मनोनयनमै राखिँदैन ।
यसैगरी अन्तिम १० मा सन्न्यास लिइसकेका करिम बेन्जेमा, नेदरल्यान्ड्सका भर्जिल भान डाइक, जर्मनीका थोमस मुलर, इंग्ल्यान्डका ह्यारी केन, बेल्जियमका केभिन डी ब्रुयन, फ्रान्सका एन्टोइन ग्रिजम्यान, अर्जेन्टिनाका लाउटारो मार्टिनेज र इटालीका मार्को भेराट्टी परेका छन् ।
यो अवार्ड सन् २००३ देखि प्रत्येक वर्ष दिँदै आइएको हो । पहिलो संस्करणको अवार्ड रोबर्ट बागियोले पाएका थिए ।
ब्राजिलियन रोनाल्डो, रोनाल्डिन्हो, ज्लाटान इब्राहिमोभिक, आन्द्रेस इनियस्टा, सामुअल इटो, जियानलुइगी बुफन, इकर क्यासिल्लास, इडिन्सन काभानी, लुका मोड्रिक, मोहम्मद सालाह र रोबर्ट लेवान्डोस्कीले पाइसकेका छन् ।
विश्वकप विजेता मेस्सीले भने हालसम्म यो अवार्ड जित्न सकेका छैनन् । यो अवार्डमा यसपटक मेस्सीलाई मुख्य दाबेदार मानिएको छ ।
