विराटनगर । विराटनगरको शहिद रङ्गशालामा बिहीबारबाट सुरु हुने पूर्वकै प्रतिष्ठित फुटबल प्रतियोगिता ‘विराट गोल्डकप’ को सम्पूर्ण तयारी पुरा भएको छ ।
विराटनगरस्थित रङ्गशाला परिसरमा बुधबार पत्रकार सम्मेलन गर्दै आयोजकले आठौं संस्करणको विराट गोल्डकपको सम्पूर्ण तयारी पुरा भएको जनाएको हो । आयोजकका अनुसार प्रतियोगितालाई दृष्टिगत गर्दै शहिद रङ्गशालाको मैदान मर्मत तथा सरसफाई, प्रायोजकहरुको व्यवस्थापन र सहभागी हुने टीमको छनौट लगायतका कार्यहरु सम्पन्न भईसकेका छन् । प्रतियोगितामा नेपाल, भारत र भुटान समेतका गरी कुल १० वटा टीमको सहभागिता रहने आयोजक संस्था विराट गोल्डकप फुटबल ट्रष्टका अध्यक्ष किशोर बहादुर शाहीले बताए ।
यसपटक गोल्डकपको विजेता र उप–विजेता टीमले क्रमशः रु. ११ लाख र ५ लाख ५० हजार रुपैयाँ नगद पुरस्कार प्राप्त गर्ने आयोजकले जनाएको छ । आयोजकका अनुसार गोल्डकपको उत्कृष्ट प्रशिक्षक, गोलरक्षक र सर्वाधिक गोलकर्तालाई जनही रु. २१ हजार नगद पुरस्कार प्रदान गरिनेछ । गोल्डकपको म्यान अफ द म्याचलाई भने ११ हजार नगद तथा सर्वोत्कृष्ट खेलाडीलाई मोटरसाईकल पुरस्कार दिने व्यवस्था गरिएको छ । आठौं संस्करणको विराट गोल्डकपमा मोरङ, सुनसरी र झापाका साथै आसपासका अन्य जिल्ला र भारतको बिहारसम्मका दर्शकहरुको सहभागिता रहने अपेक्षा आयोजकले गरेको छ । बिहीबार हुने पहिलो खेलमा मात्रै करिब २५ सय बढी दर्शकहरुको सहभागिता रहने अनुमान गरिएको छ ।
हाल गोल्डकपकोे सबै तयारी सकिएर टिकट बिक्री वितरण लगायतका कार्यहरु धमाधम भईरहेको आयोजकले जनाएको छ । आयोजकका अनुसार गोल्डकपको सिजनल टिकट रु. २ हजार र वन डे टिकट रु. २०० का दरले बिक्री भईरहेको छ । सेमि–फाईनल र फाईनल खेलको टिकट भने ३०० र ५०० का दरले बिक्री गर्ने तयारी छ ।
