विराटनगर । जिल्ला प्रहरी कार्यालय मोरङले होली लक्षित बिशेष सुरक्षा योजना कार्यान्वयनमा ल्याएको छ ।
रङहरुको पर्व होलीलाई सुरक्षित र मर्यादित बनाउन मोरङ प्रहरी चाडपर्व लक्षित सुरक्षा योजना कार्यान्वयनमा ल्याएको हो । होलीमा हुनसक्ने विभिन्न अवाञ्छित तथा उच्छृङखल गतिविधि नियन्त्रणका निम्त्ति सुरक्षा योजना कार्यान्वयनमा ल्याईएको मोरङ प्रहरीले जनाएको छ ।
प्रहरीका अनुसार होलीको समयमा कुनै अप्रिय घटना हुन नदिन आईतबारबाट नै बिशेष सुरक्षा रणनीति कार्यान्वयनमा ल्याईएको हो । होलीलाई सभ्य र भव्य बनाउन जिल्लाभर ठुलो संख्यामा प्रहरी परिचालन गरी सुरक्षा व्यवस्थामा कडाई गरिएको बताईएको छ । तराई सोमबार परेको होलीका दिन कुनै अप्रिय घटना हुन नदिन जिल्लाभर करिब ७०० को संख्यामा प्रहरी परिचालन गरिने मोरङ प्रहरीले जानकारी दिएको छ ।
होलीको समयमा आम सर्वसाधारण र सवारीसाधनको चहलपहल तुलनात्मक रुपमा बढ्ने भएकाले चेकजाँच र निगरानीमा आईतबारदेखि नै कडाई गरिएको छ । सोमबार भने जिल्लाभर १०० वटा स्थानमा चेक प्वाईन्ट स्थापना गरी चेकजाँचमा कडाई गर्ने योजना रहेको मोरङका प्रहरी प्रवक्ता रञ्जन कुमार दाहालले बताए ।
होलीलाई सुुरक्षित बनाउन मोरङ प्रहरीले सोमबार जिल्ला ट्राफिक प्रहरी कार्यालयसँगको समन्वयमा संयुक्त टोली परिचालनको तयारी समेत गरेको छ ।
होली अवधिमा जिल्लाभर प्रहरी उपरीक्षकको कमाण्डमा ९ प्रकारको प्रहरी टोली परिचालन गरिने जिल्ला प्रहरी कार्यालय मोरङले जनाएको छ ।
कार्यालयका अनुसार प्रहरी नायब उपरीक्षकको कमाण्डमा २५ जनाको रिजर्भ टोली परिचालन गर्नुका साथै होलीलाई सुरक्षित बनाउन विराटनगर क्षेत्रभित्र मात्रै ९३ जनाको पिकेट ड्युटी र क्विक रेस्पोन्स टिम खटाउने व्यवस्था मिलाइएको छ ।
कसैको इच्छा विपरित लोला हान्ने, रङ लगाउने र मादक पदार्थ सेवन गरी होहल्ला तथा झैं–झगडा गर्ने लगायतका गतिविधि नियन्त्रण गर्न सादा पोशाकमा समेत उल्लेख्य प्रहरी जनशक्ति परिचालन गरिने मोरङका प्रहरी प्रवक्ता रञ्जन कुमार दाहालले बताए ।
सुरक्षा व्यवस्थामा कडाई गर्नुका साथै मोरङ प्रहरीले भने अनिच्छुक र अपरिचित व्यक्तिलाई रङ नलगाउन तथा वृद्धवृृद्धा र बालबालिकाको सम्मान गर्न आग्रह गरेको छ ।
प्रहरीले गाँजा–भाङ्ग र मादक पदार्थको सेवन गरी सवारीसाधन नचलाउन तथा ट्राफिक नियम उल्लंघन नगर्न समेत आम सर्वसाधारणलाई अनुरोध गरेको छ ।