विराटनगर । पूर्वकै प्रतिष्ठित फुटबल प्रतियोगिता ‘विराट गोल्डकप’ आगामी चैत्र तेश्रो साताबाट सुरु हुने भएको छ ।
विराटनगरस्थित सहिद रंगशालामा आगामी चैत्र १५ गतेबाट गोल्डकप सुरु हुन लागेको हो ।
हाल प्रतियोगिताकोे सम्पूर्ण पूर्वतयारी अन्तिम चरणमा पुगिसकेको आयोजकले जनाएको छ ।
कोशी प्रदेशकै ठुलो फुटबल प्रतियोगिता विराट गोल्डकपकोे आठौं संस्करण आगामी चैत्र १५ गतेदेखि सञ्चालन हुने भएको छ ।
विराट गोल्डकप फुटबल ट्रष्टको आयोजनामा आगामी चैत्र १५ देखि २४ गतेसम्म ८ औं संस्करणको गोल्डकप सञ्चालन हुने भएको हो ।
विराटनगरस्थित सहिद रंगशालामा मंगलबार पत्रकार सम्मेलन गर्दै फुटबल ट्रष्टले गोल्डकप आयोजनाबारे जानकारी दिएको हो ।
यसवर्षको गोल्डकपमा नेपाल, भारत र भुटानका गरी कुल १० वटा टीमको सहभागिता रहने आयोजकले जनाएको छ ।
आयोजकका अनुसार गोल्डकपमा भारतबाट २, भुटानबाट १ र नेपालका विभागीयसहित कुल ७ टीमको सहभागिता रहने छ ।
गोल्डकप सञ्चालनको सम्पूर्ण पूर्र्वतयारी अन्तिम चरणमा पुगिसकेको जानकारी दिँदै आयोजकले गोल्डकप सञ्चालनका लागि कुल १ करोड १८ लाख ४३ हजार रुपैयाँ खर्च हुने अनुमान गरेको छ ।
यसपटक हुने आठौं संस्करणको विराट गोल्डकपको विजेता र उप–विजेताले पाउने नगद पुुरस्कारको राशी भने आधा घटाईएको आयोजकले जनाएको छ ।
आयोजकका अनुसार गतवर्षको गोल्डकपमा भएको घाटालाई दृष्टिगत गर्दै यसवर्षको पुरस्कार राशी घटाईएको हो ।
गतवर्ष प्रतियोगिताको विजेता र उप–विजेताले क्रमशः रु. २० लाख ५१ हजार र १० लाख ५१ हजार नगद पुरस्कार प्राप्त गरेकोमा यसपटक विजेताले ११ लाख र उप–विजेताले ५ लाख ५० हजार रुपैयाँ मात्र प्राप्त गर्नेछन् ।
पुरस्कार राशी घटाईएपनि खेलाडीहरुको दैनिक भत्ता बढाईएको आयोजक संस्थाका अध्यक्ष किशोर बहादुर शाहीले बताए ।
चैत्र १५ देखि २५ गतेसम्म कुल १० दिन सञ्चालन हुने गोल्डकपको उत्कृष्ट प्रशिक्षक, गोलरक्षक र सर्वाधिक गोलकर्तालाई जनही रु. २१ हजार, म्यान अफ द म्याचलाई ११ हजार तथा सर्वोत्कृष्ट खेलाडीलाई मोटरसाईकल पुरस्कार दिने व्यवस्था आयोजकको छ ।
आयोजकका अनुसार यसवर्षको फुटबल प्रतियोगितालाई भने कोशी प्रदेश सरकारले २५ लाख, विराटनगर महानगरपालिकाले १२ लाख र राष्ट्रिय खेलकुल परिषदले ५ लाख नगद सहयोग गर्ने भएको छ ।
विराट गोल्डकप विराटनगरको पहिचान र प्रतिष्ठासँग जोडिएको हुनाले यसको प्रर्वद्धनमा सबैले सहयोग गर्नुपर्ने महानगर प्रमुख नागेश कोईरालाले बताए ।
२०१८ सालदेखि तत्कालीन राजा महेन्द्रको नामबाट सुरु गरिएको गोल्डकप २०६२/०६३ सालको जनआन्दोलनपछि परिवर्तित नामसहित २०६८ सालबाट विराट गोल्डकपको रुपमा आयोजना हुँदै आएको छ ।
गत वर्ष सातौं संस्करणको विराट गोल्डकपको विजेता विराटनगरकै ‘विराटनगर सिटी फुटबल क्लब’ भएको थियो भने उप–विजेता भारतस्थित केरलाको ‘लुका सकर क्लब’ बनेको थियो ।
