विराटनगर । दक्षिण अफ्रिकामा जारी यु-१९ विश्वकपमा क्रिकेटमा नेपालले सुपर सिक्सको पहिलो खेलमा बंगलादेशको सामना गर्दै छ ।
नेपाल र बंगलादेशबीचको खेल नेपाली समयअनुसार आज दिउँसो १:४५ बजेबाट सुरु हुने छ ।
यसअघि नेपाल र बंगलादेशको भेट दुई पटक भएको छ । जसमा एकमा नेपाल र एकमा बंगलादेश विजयी भएका छन् ।
नेपालले २००२ मा भएको यु-१९ विश्वकप प्लेट च्याम्पियनसिपमा सेमिफाइनलमा बंगलादेशलाई २३ रनले पराजित गर्दै फाइनलको यात्रा तय गरेको थियो ।
नेपाल र बंगलादेशको दोस्रो भेट २०१६ मा भएको यु-१९ विश्वकपमा भएको थियो । सो खेलमा भने बंगलादेशसँग ६ विकेटले पराजित हुँदै नेपाल विश्वकपबाट बाहिरिएको थियो ।
त्यसयता भने नेपाल र बंगलादेशको भेट भएको छैन ।
आजको खेलमा बंगलादेश सुपर सिक्सको पहिलो खेलमा जित हासिल गर्दै सेमिफाइनलमा पुग्ने सम्भावना कायमै राख्न चाहन्छ ।
नेपालको भने सेमिफाइनल पुग्ने सम्भावना सकिएको छ ।
नेपाल सुपर सिक्स खेल्नुअघि नै सेमिफाइनल पुग्ने दौडबाट बाहिरिएको हो ।
सुपरसिक्सअन्तर्गत मंगलबार भएका खेलमा भारत र पाकिस्तान विजयी भएसँगै नेपालको सेमिफाइनल पुग्ने सम्भावना समाप्त भएको हो ।
भारतले सुपर सिक्सको खेलमा न्युजिल्यान्डलाई दुई सय १४ रनले हराउँदा पाकिस्तानले आयरल्यान्डलाई तीन विकेटले पराजित गरेको थियो ।
त्यसो त नेपालले सुपर सिक्सअन्तर्गत दुई खेल खेल्ने तालिका छ ।
तर दुवै खेल जितेको खण्डमा पनि अंकविहीन नेपालको चार अंक मात्र हुन्छ भने भारत र पाकिस्तानले ६/६ अंक जोडिसकेकाले नेपाल अब सुपर सिक्स खेलेर घर फर्कनुपर्ने छ ।
किनभने सुपरसिक्सको एउटा समूहबाट शीर्ष दुई टोली मात्र सेमिफाइनलमा पुग्छन् ।
नेपाल रहेको समूहबाट भारत र पाकिस्तान अघि बढ्ने सम्भावना बलियो छ ।
उनीहरूले तीन/तीन खेल जितेर ६/६ अंक बनाएका छन् ।
बंगलादेशले दुई खेलबाट दुई अंक बनाउँदा न्युजिल्यान्डले तीन खेलबाट दुई अंक जोडेको छ ।
तर, नेपालले तीन खेलमा दुई अंक जोड्दा र आयरल्यान्डसँग पनि समान अंक छ ।
