एजेन्सी । नर्वेका राजा हेराल्ड भी शारीरिक रूपमा कमजोर छन् । आगामी फेब्रुअरी २१ मा उनी ८७ वर्ष पुग्छन् ।
उनी युरोपका सबैभन्दा बुढा राजा हुन् । ३३ वर्षयता उनी राजगद्दीमा छन् । प्रौड उमेरका हेराल्ड वैशाखीको सहारामा हिँडडुल गर्छन् ।
राजा हेराल्डको हालैका वर्षहरूमा मुटुको शल्यक्रिया गरिएको छ । श्वाससम्बन्धी समस्या तथा संक्रमणका कारण उनी अस्पतालमा उपचाररत छन् ।
आफ्नो बढ्दो स्वास्थ्य समस्या तथा बढ्दो उमेरले राजा हेराल्ड चिन्तित छन् । तर, यति हुँदाहुँदै पनि उनी राजगद्दीबाट हट्न तयार छैनन् ।
पद छाड्ने कुनै योजना नभएको उनले दोहोर्याउँदै आएका छन् ।
हालैमात्र डेनमार्ककी महारानी मार्गरेटले आश्चर्यजनक रूपमा पद छाड्ने निर्णय गरेकी थिइन् ।
नयाँ वर्ष २०२४ को पूर्वसन्ध्यामा ८३ वर्षीय रानी मार्गरेटले पद त्यागेपछि डेनमार्कले नयाँ राजा पाएको थियो ।
मार्गरेटले पद त्याग गरेपछि उनका जेठा छोरा फेडेरिक एक्स राजगद्दीमा बसेका थिए ।
बारम्बार कहिल्यै पद नछाड्ने कुरामा जोड दिँदै आएकी मार्गरेटले छोरा फे डरिकको पक्षमा पद त्याग्ने घोषणा गरेकी थिइन् ।
मार्गरेटले राजगद्दी त्यागेपछि टिप्पणीकारहरूप्रति इंगित गर्दै राजा हेराल्डले अझै पद नत्याग्ने बताएका हुन् ।
मंगलबार आफ्नो पहिलो सार्वजनिक टिप्पणीमा राजा हेराल्डले भनेका छन्, “मैले सधैँ भनेको कुरामा अडिग छु । मैले स्टोर्टिङ (संसद्) को सपथ लिएको छु र यो जीवनभरका लागि हो ।”
आफ्ना छोरा युवराज हाकनसँगै ओस्लोमा नर्वेली प्रेस सेन्टरको भ्रमणका क्रममा उनले उक्त टिप्पणी गरेका हुन् ।
