भारतमा एक व्यक्तिले कोरोना भाइरसविरुद्ध खोपको ११ डोज लिएका छन् ।
बिहारको मधेपुरा जिल्लाको पुरैनीका ८४ वर्षीय ब्रह्मदेव मण्डलले आफूले कोरोना भाइरसविरुद्ध खोपको ११ डोज लिएको दाबी गरेका हुन् ।
उनले आफूले खोप लगाउन थालेदेखि आफू कहिल्यै बिरामी नपरेको र स्वास्थ्यमा सुधार आएको बताएका छन् । उनले कोरोना भाइरसविरुद्धको कुन खोप लगाएको विषयमा भने जानकारी दिएका छैनन् ।
सो व्यक्तिले खोप लगाएको छ कि छैन भनेर थाहा पाउन छानबिनको विषय रहेको मधेपुराका सिभिल सर्जन डाक्टर अमरेन्द्र प्रताप शाही बताउँछन् । डा. शाहीका अनुसार छानबिन पछि ती व्यक्तिले गरेको दाबी सत्य पाइएमा जिम्मेवार व्यक्तिलाई कारबाही गरिनेछ ।
