प्रशिक्षक थोमस टुचेलको खेलाडी छनोट प्रकृयासँग असन्तुष्ट बनेका चेल्सीका बेल्जियन फरवार्ड रोमेलु लुकाकुले आफू इन्टर मिलान फर्कन चाहेको बताएका छन् ।
स्काई स्पोट्र्स इटालीसँगको कुराकानीमा लुकाकुले यस्तो बताएका हुन् । इटालियन च्याम्पियन इन्टरबाट लुकाकु यसै सिजन इङ्गिलस क्लब चेल्सी आएका थिए । तर चेल्सीमा अनुबन्ध भएको केही महिना नबित्दै उनी स्ट्यामफोर्ड ब्रिजमा निराश बनेका हुन् ।
एक सय १५ मिलियन युरोमा चेल्सी पुगेका लुकाकु पछिल्लो समय कोरोना र चोटबाट पीडित बनेका थिए । तर त्यसअघि निकै फर्ममा देखिएका लुकाकु हाल पूर्ण रुपमा फिट भइसकेका छन् ।
कोरोना र चोटबाट पूर्ण रूपमा निको भएका लुकाकुले पछिल्ला दुुई खेलमा दुई गोल समेत गरिसकेका छन् । व्यक्तिगत रूपमा राम्रै प्रदर्शन गरे पनि चेल्सीका प्रशिक्षक थोमस टुचेलको ‘फर्मेसन’बाट उनी खासै सन्तुष्ट छैनन् ।
‘खेलका लागि टुचेलको खेलाडी छनोट र फर्मेसन प्रणाली फरक छ र म यसै विषयमा खुशी छैन’ स्काई स्पोट्र्स इटालीसँग लुकाकुले भनेका छन्, ‘शारीरिक रुपमा म ठिक भए पनि क्लबको अवस्थाले सन्तुष्ट छैन ।’
व्यवसायीक खेललाई निरन्तरता दिनु नै आफ्नो अन्तिम विकल्प रहेको बताएका लुकाकुले घुमाउरो भाषामा यहीँ विन्टर ट्रान्सफर विन्डोमा इन्टर फर्कन चाहेको बताएका छन् ।
‘अचनाक इन्टरबाट बिदा भएकोमा म समर्थकसँग माफी माग्न चाहन्छु, इन्टर मेरो हृदयमा छ’ लुकाकुले भनेका छन्, ‘म मेरो करिअरकाे अन्त्यतिर होइन उत्कृष्ट स्तरमा रहँदा नै इन्टर फर्कन चाहन्छु ।’
चेल्सीको जर्सीमा १८ खेल खेल्दै सात गोल र दुई असिस्ट दिएका लुकाकुले ९५ खेल खेल्दा ६४ गोल र १८ असिस्ट गरेका थिए ।
