विराटनगर । काठमाडौंको बूढानीलकण्ठमा घर भाडामा लिएर अवैध रूपमा सुन प्रशोधन गर्ने गरेको आरोपमा प्रहरीले तीन जना चिनियाँ नागरिकलाई पक्राउ गरेको छ।
प्रहरीले उनीहरूको साथबाट करिब २१ किलो सुन बरामद गरेको जनाएको छ।नेपाल प्रहरीको अपराध अनुसन्धान कार्यालय, टेकुबाट खटिएको टोलीले बिहीबार साँझ बूढानीलकण्ठस्थित साढे दुईतले घरमा छापा मारेको थियो।
प्रहरी टोली पुग्दा घरभित्र सुन गाल्ने काम भइरहेको स्रोतले जनाएको छ। पक्राउ गर्ने क्रममा प्रहरी र आरोपितहरूबीच केहीबेर धक्कामुक्कीसमेत भएको बताइएको छ।
घरमा खानतलासी गर्दा प्रहरीले सुन गाल्ने, गुणस्तर जाँच गर्ने तथा विभिन्न आकारमा ढाल्ने उपकरणहरू पनि बरामद गरेको छ।
प्रारम्भिक अनुसन्धानअनुसार चिनियाँ नागरिकहरूले घरमा च्यानल गेट र सीसीटीभी जडान गरी व्यवस्थित रूपमा सुन प्रशोधनको काम गर्दै आएका थिए।
प्रहरीले बरामद गरेको सुन कहाँबाट ल्याइएको थियो, कुन नाकाबाट नेपाल भित्र्याइएको थियो र प्रशोधनपछि कसलाई आपूर्ति गर्ने गरिएको थियो भन्ने विषयमा अनुसन्धान भइरहेको जनाएको छ।
कारोबारमा अन्य व्यक्ति वा समूहको संलग्नता रहे-नरहेकोबारे समेत प्रहरीले अनुसन्धान गरिरहेको छ।
बरामद सुनको वास्तविक परिमाण र गुणस्तर यकिन गर्न गुणस्तर तथा नापतौल विभागका कर्मचारी र सुनचाँदी व्यवसायीका प्रतिनिधिको सहयोगमा परीक्षण भइरहेको छ।
