काठमाडौं। कप्तान सन्दीप लामिछानेको उत्कृष्ट बलिङसँगै नेपालले एसीसी प्रिमियर कपमा विजयी सुरुवात गरेको छ। मलेसियाको वाईएसडी यूकेएम ओभलमा सोमबार भएको खेलमा नेपालले बहराइनलाई ७ विकेटले पराजित गरेको हो।
बहराइनले दिएको ८८ रनको लक्ष्य नेपालले ३ विकेट गुमाएर पूरा गर्यो। नेपालका लागि अर्जुन कुमालले अविजित ३६ रन बनाए भने रोहित पौडेल १९ रनमा नटआउट रहे। बहराइनका इमरान जावेदले २ विकेट लिए भने नेपालको एक विकेट रनआउटबाट गुमेको थियो।
त्यसअघि टस हारेर पहिले ब्याटिङ गरेको बहराइन नेपाली बलरसामु टिक्न नसक्दा ३६.२ ओभरमा ८७ रनमै अलआउट भएको थियो। कप्तान सन्दीप लामिछानेले १० ओभरमा केवल १४ रन खर्चेर ५ विकेट लिए। उनले ४ ओभर मेडन राखेका थिए। ललित राजवंशीले ३ तथा करण केसीले २ विकेट लिए।बहराइनका लागि फियाज अहमदले सर्वाधिक १५ रन बनाए। मुहम्मद वासिमले १३ तथा अली दाउदले १० रन जोडे। सन्दीपले आफ्नो बलिङ स्पेलको सुरुवातमै प्रभाव जमाउँदै पहिलो बलमै विकेट लिएका थिए र उत्कृष्ट प्रदर्शनलाई निरन्तरता दिँदै पाँच विकेट पूरा गरेका थिए।
यससँगै नेपालले प्रतियोगितामा विजयी सुरुवात गरेको छ। नेपालले आफ्नो दोस्रो खेलमा बिहीबार आयोजक मलेसियासँग प्रतिस्पर्धा गर्नेछ।
