विराटनगर । प्रहरीले सर्लाहीबाट १०९ किलो गाँजासहित दुई भारतीय नागरिकलाई पक्राउ गरेको छ।
पक्राउ पर्नेमा भारतको बिहार राज्य, सितामढी जिल्ला अन्तर्गत समुद्र थाना क्षेत्रका दीपक कुमार महतो र अमन कुमार रहेका छन्।
प्रहरी कार्यालय नवलपुर र जिल्ला ट्राफिक प्रहरी कार्यालय नवलपुरको संयुक्त टोलीले बागमतीबाट जनकपुरतर्फ जाँदै गरेको भारतीय नम्बर प्लेटको कारलाई रोकी जाँच गर्दा ठूलो परिमाणमा गाँजा बरामद गरेको हो।
आज बिहान लालबन्दी नगरपालिका–१ स्थित पूर्वपश्चिम राजमार्गमा नियमित सवारी जाँचका क्रममा कारको डिक्कीमा लुकाइछिपाइ राखिएको २३ वटा पोकाबाट करिब १०९ किलो गाँजा फेला परेको प्रहरीले जनाएको छ।
बरामद गरिएको गाँजा र कारसहित दुवै जनालाई नियन्त्रणमा लिई घटनाबारे थप अनुसन्धान भइरहेको प्रहरीले जानाएको छ ।
