धनगढी । कैलालीमा वन अतिक्रमण हटाउने क्रममा डिभिजन वन कार्यालयका कर्मचारीले एक महिलाले खुद्रा सामान बिक्रीका लागि प्रयोग गर्दै आएको टेम्पो भिरबाट खसालेपछि विवाद उत्पन्न भएको छ। घटनाको भिडियो सामाजिक सञ्जालमा भाइरल भएपछि वन कार्यालयको कार्यशैलीमाथि व्यापक आलोचना भइरहेको छ।
भीमदत्त राजमार्गअन्तर्गत गोदावरी नगरपालिका–४ बासपानीमा धनादेवी धामीले पुरानो टेम्पोलाई पसलका रूपमा प्रयोग गर्दै दैनिक गुजारा चलाउँदै आएकी थिइन्। धामीका अनुसार वन कार्यालयका कर्मचारीले पहिले टेम्पोभित्रका सामान झारेपछि आफूले घर लैजान दिने आग्रह गर्दा पनि नमानेर टेम्पोलाई सडकबाट भिरमा खसालिदिएका हुन्।
“सामान निकालिसकेपछि म आफैं टेम्पो लैजान्छु भनेकी थिएँ, तर कसैले सुनेन,” धामीले बताएकी छन्। टेम्पो नै आफ्नो जीविकोपार्जनको मुख्य आधार रहेको भन्दै उनले सम्बन्धित निकायसँग क्षतिपूर्तिको माग गरेकी छन्।
यता, डिभिजन वन कार्यालय धनगढीका प्रमुख रामविचारी ठाकुरले भने उक्त टेम्पो लामो समयदेखि वन तथा सडक क्षेत्र अतिक्रमण गरेर राखिएको दाबी गरेका छन्। उनका अनुसार कार्यालयले गत पुस महिनादेखि नै पटक–पटक हटाउन मौखिक र लिखित रूपमा आग्रह गर्दै आएको थियो।
“कर्मचारी टेम्पो खाली गराउन पुगेका बेला गालीगलौज भएपछि आवेशमा यस्तो घटना भएको हुन सक्छ,” ठाकुरले भने। उनले टेम्पो सडकमा चलाउन नमिल्ने अवस्थाको पुरानो सवारी रहेको पनि दाबी गरेका छन्।
वन कार्यालयका अनुसार राजमार्ग क्षेत्रको अतिक्रमण हटाउने अभियानअन्तर्गत हालसम्म ४७ वटा संरचना हटाइसकिएको छ। तर, अतिक्रमण हटाउने नाममा नागरिकको सम्पत्तिमा क्षति पुर्याउने शैली उचित हो वा होइन भन्ने विषयमा घटनापछि सार्वजनिक रूपमा बहस सुरु भएको छ।
स्थानीयवासी तथा सामाजिक सञ्जाल प्रयोगकर्ताले कानुनी प्रक्रिया अवलम्बन नगरी नागरिकको जीविकोपार्जनको साधन भिरबाट खसालिएको भन्दै घटनाको निष्पक्ष छानबिन र जिम्मेवारमाथि कारबाहीको माग गरेका छन्।
