विराटनगर । कोशी प्रदेश सरकारले आगामी आर्थिक वर्ष ०८३/८४ का लागि करिब ३८ अर्ब रुपैयाँको बजेट ल्याउने तयारी गरेको छ।
आर्थिक मामिला तथा योजना मन्त्री विदुरकुमार लिङ्थेपका अनुसार चालू आर्थिक वर्षको तुलनामा करिब २ अर्ब बढी बजेट ल्याइनेछ। खर्च कार्यान्वयन दर घटेकाले नगद मौज्दात बढ्नुका साथै संघीय अनुदान पनि वृद्धि भएकाले बजेट आकार बढ्ने अनुमान गरिएको हो।
सरकारले शिक्षा, स्वास्थ्य, कृषि, भौतिक पूर्वाधार र सूचना प्रविधिलाई प्राथमिकतामा राखेर नीति तथा कार्यक्रम अघि बढाउने तयारी गरेको छ। साथै संघीय बजेटका केही नीतिगत व्यवस्थालाई ध्यानमा राख्दै निम्न मध्यम वर्ग र सुकुम्बासी लक्षित राहत कार्यक्रम पनि ल्याइने बताइएको छ।
गत आर्थिक वर्षमा करिब ८० प्रतिशत बजेट खर्च भए पनि चालू आर्थिक वर्षमा करिब ७० प्रतिशत मात्र खर्च हुने अनुमान छ। वैशाख मसान्तसम्म प्रदेश सरकारको संचित कोषमा करिब १२ अर्ब ८१ करोड रुपैयाँभन्दा बढी नगद मौज्दात रहेको जनाइएको छ।
चालू आर्थिक वर्षको बजेट ३६ अर्ब २ करोड रुपैयाँ रहेको थियो।
