बुटवल । क्रिकेट संघ रुपन्देहीको अध्यक्षमा हरिबहादुर थापा निर्वाचित भएका छन्।संघको सोमबार राति सम्पन्न पाँचौं अधिवेशनबाट थापाले ६९ मत प्राप्त गर्दै दोस्रो कार्यकालका लागि अध्यक्ष पदमा विजय हासिल गरेका हुन्। उनका निकटतम प्रतिस्पर्धी शक्ति गौचनले ४९ मत प्राप्त गरेका थिए।
भैरहवाका व्यवसायी तथा होटल र कलेज सञ्चालक समेत रहेका थापाले चार वर्षअघि भएको निर्वाचनमा पनि शक्ति गौचनलाई पराजित गरेका थिए।
निर्वाचनमा थापा र गौचन पक्षले प्यानल बनाएर प्रतिस्पर्धा गरेका थिए। पदाधिकारीसहित अधिकांश सदस्य पदमा थापा प्यानलका उम्मेदवार विजयी भएका छन्।
उपाध्यक्षमा खेमराज भुसाल, सचिवमा उदयकुमार मल्लिक र कोषाध्यक्षमा धीरज अधिकारी क्षत्री निर्वाचित भएका छन्।
निर्वाचन प्रमुख कूलमणि ज्ञवालीका अनुसार महिला सदस्यमा उमा अधिकारी निर्वाचित भएकी छन्। अन्य सदस्यमा प्रशान्तविक्रम मल्ल, निरजप्रताप खाँण, पुनित पोखरेल, मनोज भण्डारी, भुवन पाण्डे, विजयसिंह ज्ञवाली, कृष्णकुमार कुँवर, ज्वालेसप्रसाद प्रधान, अन्तिम थापा र ताराप्रसाद पाठक निर्वाचित भएका छन्।
निर्वाचित महिला सदस्य उमा अधिकारी सिद्धार्थनगर नगरपालिकाकी उपप्रमुख समेत हुन्।
