काठमाडौं । भारतीय क्रिकेटका उदाउँदा खेलाडी वैभव सूर्यवंशी पहिलोपटक भारतको सिनियर राष्ट्रिय क्रिकेट टोलीमा परेका छन्। १५ वर्षीय सूर्यवंशीलाई आयरल्यान्ड र इंग्ल्यान्डविरुद्ध हुने टी–२० अन्तर्राष्ट्रिय शृङ्खला तथा एसियाली खेलकुदका लागि घोषणा गरिएको टोलीमा समावेश गरिएको हो।
भारतीय टोलीको कप्तानी श्रेयस अय्यरले गर्नेछन् भने उपकप्तानको जिम्मेवारी तिलक वर्मालाई दिइएको छ। यसअघिका कप्तान सूर्यकुमार यादव भने यी तीनवटै प्रतियोगिताका लागि टोलीमा अटाएका छैनन्।
आयरल्यान्ड र इंग्ल्यान्डविरुद्धको टी–२० शृङ्खला जुन–जुलाई महिनामा हुनेछ भने एसियाली खेलकुद अन्तर्गतको क्रिकेट प्रतियोगिता सेप्टेम्बरमा जापानमा आयोजना हुने तालिका रहेको छ।
भारतले घोषणा गरेको टोलीमा श्रेयस अय्यर (कप्तान), तिलक वर्मा (उपकप्तान), अभिषेक शर्मा, सन्जु सामसन, इशान किशन, शिवम दुबे, नितिश कुमार रेड्डी, अक्षर पटेल, वासिङ्टन सुन्दर, वरुण चक्रवर्ती, रवि बिश्नोई, मोहम्मद सिराज, अर्शदीप सिंह, हर्षित राणा, प्रिन्स यादव र वैभव सूर्यवंशी रहेका छन्।
उमेर समूहका प्रतियोगिता तथा घरेलु क्रिकेटमा उत्कृष्ट प्रदर्शन गर्दै आएका वैभवको सिनियर टोलीमा छनोटलाई भारतीय क्रिकेटको भविष्यसँग जोडेर हेरिएको छ। कम उमेरमै राष्ट्रिय टोलीमा स्थान बनाउन सफल भएका उनले अब अन्तर्राष्ट्रिय स्तरमा आफ्नो प्रतिभा प्रदर्शन गर्ने अवसर पाएका छन्।
