विराटनगर । नेपाल प्रहरीको केन्द्रीय अनुसन्धान ब्यूरो (सीआईबी) ले बैंक कर्जा दुरुपयोग गरेको आरोपमा ओमप्रसाद पाण्डेलाई पक्राउ गरेको छ।
सीआईबीले बुधबार उनलाई जानकी मेडिकल कलेज परिसरबाट पक्राउ गरेको जनाएको छ।
प्रहरीका अनुसार पाण्डेले बर्दिबास नगरपालिका-६ मा ‘इन्स्टिच्युट अफ एग्रिकल्चर, फरेस्ट एन्ड भेटेरिनरी साइन्सेस प्रालि’ नामक कम्पनी स्थापना गरी प्रभु बैंक बाट कर्जा लिएका थिए।
अनुसन्धानका क्रममा कम्पनीको विस्तृत परियोजना प्रतिवेदन नभएको अवस्थामा धितोको अस्वाभाविक रूपमा उच्च मूल्यांकन गराई कर्जा स्वीकृत गराइएको खुलेको छ।
प्रहरीले पाण्डेमाथि बैंकबाट प्राप्त कर्जा तोकिएको उद्देश्यमा प्रयोग नगरी अन्य क्षेत्रमा लगानी गर्दै पटक–पटक दुरुपयोग गरेको आरोप लगाएको छ।
ओमप्रसाद पाण्डे काठमाडौं महानगरपालिका-९, रातोपुल निवासी हुन्। उनी राम जानकी हेल्थ फाउन्डेसनका सञ्चालक समिति अध्यक्ष तथा उक्त कम्पनीका एकल सञ्चालक समेत रहेका छन्।
सीआईबीका प्रवक्ता शिवकुमार श्रेष्ठका अनुसार उच्च अदालत पाटन बाट २०८२ मंसिर २८ गते जारी भएको पक्राउ पुर्जीपछि फरार रहेका पाण्डेलाई पक्राउ गरिएको हो।
घटनाबारे थप अनुसन्धान भइरहेको प्रहरीले जनाएको छ।
