काठमाडौं। राष्ट्रिय स्वतन्त्र पार्टी (रास्वपा) का नेता गणेश पराजुली ले सरकारले जनतालाई न्याय दिलाउने उद्देश्यले अध्यादेश ल्याएको बताएका छन्।
प्रतिनिधिसभाको मंगलबारको बैठकको विशेष समयमा बोल्दै उनले जनहितका लागि जारी गरिएका आठवटा अध्यादेशमाथि विपक्षी दलले अनावश्यक विरोध गरिरहेको टिप्पणी गरे।
उनले विगत ३७ वर्षदेखि राज्यका संरचना र सेवा प्रवाह दलीयकरणका कारण कमजोर बनेको दाबी गर्दै पुराना दलहरूले कार्यकर्ता र बिचौलियामार्फत जनतालाई शोषण गरेको आरोप लगाए।
“आजको मुख्य विषय जनतालाई न्याय दिनु हो,” उनले भने, “विगतमा के–कस्ता काम भए भन्ने कुरा सदनलाई स्मरण गराइरहन आवश्यक छैन।”
नेता पराजुलीले वन ऐन र सार्वजनिक खरिद ऐनका केही प्रावधानका कारण विकास निर्माण प्रभावित भएको उल्लेख गर्दै ती कानुनमा सुधार गर्न अध्यादेश आवश्यक परेको बताए।
उनले अध्यादेश रोक्न राष्ट्रपतिसमक्ष ज्ञापनपत्र बुझाउने नेताहरूलाई प्रश्न गर्दै संविधानको कुन व्यवस्थाअनुसार यस्तो कदम चालिएको हो भन्ने जिज्ञासा राखे।
“लोकतन्त्रको वकालत गर्नेहरूले कुन नैतिक आधारमा सरकारको आलोचना गरिरहेका छन्, जनताले सबै नियालिरहेका छन्,” उनले भने।
अध्यादेशप्रति असहमति भए संसद्मा प्रतिस्थापन विधेयकमार्फत आफ्नो धारणा राख्न विपक्षी दललाई उनले आग्रह गरे।
सरकार गठन भएको सय दिन पनि नपुगेको उल्लेख गर्दै उनले भूमिहीन नागरिकमा आशा जगाउने प्रयास भइरहेको दाबी गरे। संसदीय अभ्यासमा नयाँ भएकाले काम गर्ने क्रममा केही कमजोरी हुनसक्ने भए पनि सरकार स्वच्छ नैतिकतासहित जनताको पक्षमा काम गर्न प्रतिबद्ध रहेको उनको भनाइ थियो।
यसैबीच उनले पछिल्ला दिनमा न्यायालयलाई दूषित बनाउने प्रयास भइरहेको भन्दै चिन्ता व्यक्त गरे। केही न्यायाधीशले आचारसंहिताविपरीत गतिविधिमा संलग्न भएको आरोप लगाउँदै न्यायालयको गरिमा जोगाउन सबै पक्ष जिम्मेवार हुनुपर्ने बताए।
सीमावर्ती क्षेत्रमा आवतजावत व्यवस्थापन गर्ने सरकारी कदमको बचाउ गर्दै उनले यसले जनजीवन सहज बनाउन र आन्तरिक बजार सुदृढ गर्न सहयोग पुग्ने दाबी गरे।
