भारतको इन्दोरमा मानव संवेदनालाई नै झस्काउने अमानवीय धन्दाको खुलासा भएको छ।
मसानघाटमा अन्तिम संस्कारका लागि ल्याइएका शवबाट निकालिएका लुगा, कात्रो र तन्ना चोरी गरी सफा गरेर पुनः बजारमा बिक्री गर्ने गिरोह सक्रिय रहेको खुलासा भएपछि सर्वसाधारण स्तब्ध बनेका छन्।
सस्तो मूल्यको लोभमा धेरै मानिसले अनजानमै मृतकका लुगा प्रयोग गरिरहेको तथ्यले स्वास्थ्य र मानवतामाथि गम्भीर प्रश्न उठाएको छ। अन्तिम संस्कारका क्रममा शवबाट निकालिएका सुट, साडी, ज्याकेट, तन्ना र कात्रोजस्ता सामग्री संकलन गरी सफा गरेर पुनः बजारमा बेच्ने गरिएको भारतीय सञ्चारमाध्यमले जनाएका छन्।
घाट क्षेत्रमा बस्ने केही व्यक्तिहरूले मृतकका शरीरबाट हटाइएका लुगाहरू जम्मा गर्ने गर्छन्। त्यसपछि ती सामग्रीलाई अलग्गै स्थानमा लगेर धोइपखाली, केमिकल प्रयोग र प्रेस गरेर नयाँजस्तै बनाइन्छ। यसरी तयार गरिएका लुगाहरूलाई स्थानीय सस्तो बजारमा नयाँ प्याकिङसहित बिक्रीका लागि राखिने गरिएको बताइएको छ । रिपोर्टअनुसार, हजारौँ रुपैयाँ पर्ने लुगाहरू ५० देखि २०० भारतीय रुपैयाँमै बिक्री हुने गरेका छन्।
चिकित्सकीय दृष्टिकोणले यो कार्य अत्यन्तै जोखिमपूर्ण मानिएको छ। स्वास्थ्य विशेषज्ञहरूका अनुसार मृतकको शरीरमा भएका जीवाणु वा कुनै संक्रामक रोग लुगामार्फत जीवित व्यक्तिमा सर्न सक्छ, जसले गर्दा गम्भीर किसिमको संक्रमण वा छालाको रोग लाग्न सक्ने उच्च सम्भावना रहन्छ।
धार्मिक तथा सामाजिक दृष्टिकोणले समेत मृतकका लुगाहरू यसरी चोरी गरेर व्यापार गर्नु अत्यन्तै अशोभनीय र अमानवीय कार्य मानिएको छ।
यस घटनाले मानवता र सामाजिक संवेदनामाथि नै गम्भीर प्रश्न खडा गरिदिएको छ।
