बिहीबार संसद् भवन परिसरमा सञ्चारकर्मीसँग कुरा गर्दै उनले अन्य दलका नेताहरूलाई जस्तै रास्वपाका नेताहरूलाई पनि कानुन र नियम समान रूपमा लागू हुने स्पष्ट पारे।
प्रधानमन्त्री तथा मन्त्रीहरूको सम्पत्ति विवरण सार्वजनिक गर्दा स्रोत खुलाउनुपर्नेमा जोड दिँदै उनले आफूहरूले छानबिनका लागि आयोग नै गठन गरिसकेको जानकारी दिए। “हामी कोही पनि छानबिनबाट बाहिर छैनौं। मेरो त बैंक स्टेटमेन्ट नै सार्वजनिक छ। अरूलाई जे नियम लागू हुन्छ, रास्वपाका नेतालाई पनि त्यही नियम लागू हुन्छ,” उनले भने।
यसै अवसरमा उनले पार्टीको संसदीय दलको उपनेतामा गणेश पराजुली लाई चयन गरिएको औपचारिक घोषणा पनि गरे। यसअघि निर्णय सार्वजनिक गर्न प्राविधिक रूपमा छुटेको उनले उल्लेख गरे।
संसद्को भूमिकाबारे बोल्दै लामिछानेले संसद् मर्यादित र सक्रिय हुनुपर्नेमा जोड दिए। समाजमा व्याप्त बेथिति र भ्रष्टाचार अन्त्य गर्न आफूहरू प्रतिबद्ध रहेको उनको भनाइ थियो।
