काठमाडौं – अर्जेन्टिनी सुपरस्टार लियोनल मेसीले आफ्नो करियरमा ९०० गोल पूरा गर्दै विश्व फुटबलमा नयाँ इतिहास रचेका छन्। इन्टर मियामी बाट खेल्दै उनले कन्काकाफ च्याम्पियन्स कपअन्तर्गत न्यासभिल एससी विरुद्ध खेलको सातौं मिनेटमै गोल गर्दै यो उपलब्धि हासिल गरेका हुन्।
३८ वर्षीय मेसी ९०० गोलको कीर्तिमान छुने इतिहासकै दोस्रो खेलाडी बनेका छन्। यसअघि क्रिस्टियानो रोनाल्डोले यो उपलब्धि हासिल गरिसकेका छन्। मेसीले आफ्नो करियरमा बार्सिलोना, पेरिस सेन्ट-जर्मेन, अर्जेन्टिना राष्ट्रिय टोली र हाल इन्टर मियामीबाट खेल्दै गोल गरेका छन्।
बार्सिलोनाबाट १७ वर्षमा उनले ६७२ गोल गर्दै १० ला लिगा र ४ च्याम्पियन्स लिगसहित थुप्रै उपाधि जितेका थिए। त्यसपछि पेरिस सेन्ट-जर्मेनमा दुई सिजन खेल्दा ७५ खेलमा ३२ गोल गरेका थिए, जहाँ उनले नेयमार र किलियन एमबाप्पेसँग आक्रामक ‘ट्रायो’ बनाएका थिए।
सन् २०२३ मा इन्टर मियामीमा आबद्ध भएपछि उनले ९२ खेलमा ८१ गोल गर्दै टोलीलाई उपाधि जिताउन महत्वपूर्ण योगदान दिएका छन्।अन्तर्राष्ट्रिय स्तरमा मेसीले अर्जेन्टिनाका लागि १९६ खेलमा ११५ गोल गर्दै टोलीलाई विश्वकप जिताएका छन्।
तथ्यांकअनुसार उनका ९०० गोलमध्ये ७५५ बायाँ खुट्टाबाट, १११ दायाँ खुट्टाबाट, ३० हेडमार्फत र ४ अन्य तरिकाबाट आएका छन्। उनले ११२ पेनाल्टी र ७० फ्रि–किकबाट गोल गरेका छन्।
मेसी र रोनाल्डो मात्र पुरुष फुटबल इतिहासमा ९०० गोल पूरा गर्ने खेलाडी हुन्, जबकि पेले र रोमारियो जस्ता महान खेलाडीहरू यस सूचीभन्दा पछाडि रहेका छन्।
