विराटनगर । अस्ट्रेलियाको उत्तरी सहर डार्बिनमा नेपाली राष्ट्रिय क्रिकेट टोली शुक्रबारदेखि टप एन्ड टी–२० प्रतियोगितामा आफ्नो यात्रा सुरु गर्दैछ ।
बिहीबारदेखि अस्ट्रेलियामा सुरु भएको टप एन्ड टी–२० सिरिजअन्तर्गत आज नेपालले आफ्नो पहिलो खेलमा स्थानीय टोली नर्दर्न टेरिटोरी स्ट्राइकरसँग दिउँसो १२:१५ बजे प्रतिस्पर्धा गर्नेछ ।
नेपालले दोस्रो खेलमा शनिबार बङ्गलादेश ‘ए’सँग प्रतिस्पर्धा गर्दैछ । तेस्रो खेलमा सोमबार मेलबर्न स्टार्ससँग भिड्ने नेपालले चौथो खेलमा मंगलबार होबार्ट हुरिकेन्ससँग प्रतिस्पर्धा गर्नेछ।
चौथो खेलमा अगस्ट २० मा मेलबर्न रेनेगेड्स र पाँचौ खेल अगस्ट २२ मा पाकिस्तानको शाहीन्स प्रतिस्पर्धा गर्ने तालिका रहेको छ। यो सिरिजमा ११ टोलीको सहभागिता रहेको छ।
यो प्रतियोगिता नेपालका लागि केवल एउटा विदेशी भ्रमण मात्र होइन, आगामी टी–२० विश्वकप छनोटको तयारीका दृष्टिले अत्यन्त महत्त्वपूर्ण मानिएको छ।
कप्तान रोहितकुमार पौडेलका अनुसार टोलीको लक्ष्य अनुभव बटुल्ने मात्रै होइन, सीधै जित निकाल्ने हो।
डार्बिनको पिच नेपालको मैदानभन्दा भिन्न छ। यहाँको बाउन्स र सिम मुभमेन्ट ब्याटरका लागि नयाँ चुनौती हो। यसले नेपाली ब्याटरलाई परिस्थिति अनुसार आफ्नो प्रविधि र स्कोरिङ रणनीतिमा सुधार गर्न बाध्य बनाइरहेको छ। रोहित स्वयं पनि आफ्नो रन बनाउने विकल्पमा काम गरिरहेका छन्।
तर, यस भ्रमणमा नेपालको सबैभन्दा ठूलो बल भनेको बलिङ अट्याक हो।
नेपाली टिम
रोहित पौडेल (कप्तान), दीपेन्द्रसिंह ऐरी (उपकप्तान), सन्दीप लामिछाने, कुशल भुर्तेल, आरिफ शेख, आसिफ शेख, कुशल मल्ल, गुलशन झा, भीम सार्की, रुपेस कुमार सिंह, सोमपाल कामी, नन्दन यादव, करण केसी, रिजन ढकाल, लोकेस बम र साहब आलम।
