विराटनगर । पोर्चुगिज स्टार खेलाडी क्रिस्टियानो रोनाल्डो साउदी अरेबियन क्लब अल-नासरमै रहने पक्का भएको छ ।
विभिन्न सञ्चारमाध्यममा आएका खबरअनुसार रोनाल्डो क्लबसँगको सम्झौता दुई वर्ष लम्बाउन सहमत भएका हुन् ।
नयाँ सम्झौताअनुसार रोनाल्डो सन् २०२७ सम्म अल नासरमै रहनेछन् ।
४० वर्षीय पोर्चुगिज कप्तान रोनाल्डोको सम्झौता जुनको अन्त्यमा समाप्त हुँदैछ ।
गत महिना रोनाल्डोले सामाजिक सञ्जालमार्फत क्लब छाड्ने संकेत दिएका थिए । तर, अहिले उनी क्लबमै रहन सहमत भएका हुन् ।
दुई साताअघि पोर्चुगललाई युइएफए नेसन्स लिगको उपाधि दिलाएका रोनाल्डो सन् २०२३ मा इङ्लिस क्लब म्यानचेस्टर युनाइटेडबाट अल नासर पुगेका थिए ।
उनले साउदी क्लबका लागि १११ खेलमा ९९ गोल गरेका छन् । रोनाल्डोले गत सिजन ४१ खेलमा ३५ गोल गर्दै गोल्डेन बुट जितेका थिए ।
