विराटनगर । कोशी प्रदेशका मुख्यमन्त्री हिक्मतकुमार कार्कीले १५ औँ राष्ट्रपति रनिङ शिल्डमा प्रथम हुने कोशी प्रदेशका खेलाडीलाई १ लाख रकमसहित सम्मान गर्ने प्रतिबद्धता जनाएका छन् ।
विराटनगरस्थित कोशी प्रदेश खेलकुद विकास बोर्डमा १५ औँ राष्ट्रपति रनिङ शिल्डमा सहभागी हुने प्रदेशका खेलाडी बिदाई कार्यक्रममा बोल्दै मुख्यमन्त्री कार्कीले प्रथम हुने खेलाडीलाई व्यक्तिगत, टिम स्पर्धामा प्रथम हुने टिमलाई १ लाख नगदसहित प्रशिक्षक र व्यवस्थापकलाई समेत उचित सम्मान गर्ने प्रतिवद्धता व्यक्त गर्नु भएको हो ।
मुख्यमन्त्री कार्कीले प्रदेश सरकारले खेलकुदलाई महत्व दिँदै सरकारको नीति तथा कार्यक्रममा आन्तरिक र बाह्य खेल प्रतियोगिता तथा अभ्यास गर्ने गरी ‘कोशी प्रदेश खेलग्राम’ निर्माणको योजना र तयारी गरेको बताए ।
उनले प्रदेशको सामाजिक विकास मन्त्रालयको नेतृत्वमा पूर्वाञ्चल विश्वविद्यालय र सुन्दरहरैँचा नगरपालिकाको सहकार्यमा खेलग्राम निर्माण हुने जानकारी दिए
त्यस्तै, बिदाई कार्यक्रममा बोल्दै प्रदेशका सामाजिक विकास मन्त्री तथा बोर्डका अध्यक्ष पाँचकर्ण राईले मौसमको प्रतिकूलता र छोटो समयको सूचना र अन्योलताको बाबजुद खेलाडी छनोट गर्न सफल भएको भन्दै खेलाडी तथा सरोकारवालाहरूलाई धन्यवाद व्यक्त गरे ।
मन्त्री राईले प्रदेश सरकारले खेलकुद क्षेत्रलाई महत्वको क्षेत्रको रूपमा लिएकोले खेलाडीहरूलाई निर्धक्क भएर खेल्न आग्रह गरे ।
खेलकुद विकास बोर्डका सदस्य सचिव कृष्ण बस्नेत (पर्शुराम)ले खेलाडीलाई प्रोत्साहन, सम्मान र सम्मानजनक वातावरणमा खेल खेल्ने माहोल उपलब्ध गराउने उद्देश्य साथ बोर्डले गतिविधि गरिरहेको बताए ।
बस्नेतले गत वर्षझैँ यस पटक पनि राष्ट्रपति रनिङ शिल्डमा उत्कृष्ट प्रदर्शन गर्ने खेलाडी, प्रशिक्षक र व्यवस्थापक लगायतलाई सम्मान गर्ने योजना रहेको जानकारी दिए ।
उनले राष्ट्रपति रनिङ शिल्डको छनोट प्रतियोगितामा चोटिल भएका खेलाडीहरूको उपचारको सम्पूर्ण जिम्मा बोर्डले लिने समेत बताए ।
बस्नेतका अनुसार जेठ २८ देखि ३० गते सम्म काठमाडौँमा हुने १५ औँ राष्ट्रपति रनिङ शिल्डमा कोशी प्रदेशको प्रतिनिधित्व गर्दै खेलाडी, प्रशिक्षक र व्यवस्थापक गरेर ११५ जनाको सहभागिता रहने छ ।
