काठमाडौं । सरकारले युवा तथा खेलुकद मन्त्रालयका लागि ६ अर्ब आठ करोड रुपैयाँ बजेट विनियोजन गरेको छ, यो नै नेपाली खेलक्षेत्रले प्राप्त गरेको अहिलेसम्मकै ठुलो बजेट हो ।
सरकारले गत आर्थिक वर्षको भन्दा झन्डै दोब्बर बजेट छुट्याएको हो । पछिल्लो आवको बजेट तीन अर्ब ५० करोड रुपैयाँ रहेको थियो ।
उपप्रधान तथा अर्थमन्त्री विष्णुप्रसाद पौडेलले खेल पूर्वाधारको निर्माण र खेलाडीको व्यावसायिकता विकासका लागि लगानी बढाउँदै लगिने र खेलाडीमा ‘म जित्न सक्छु’ भन्ने उच्च मनोबल विकास गर्न निरन्तर प्रशिक्षण र प्रतियोगिता सञ्चालन गरिने उल्लेख गरे ।
अर्थमन्त्री पौडेलले खेल पूर्वाधार निर्माण गर्न बजेटमा उल्लेखनीय वृद्धि गरेको बताए । उनले प्रस्तुत गरेको बजेट अनुसार झापाको दमकमा सबै प्रकारका खेल प्रतियोगिता आयोजना गर्न सकिने अन्तर्राष्ट्रियस्तरको आधुनिक रंगशाला निर्माण गरिने भएको छ ।
खेल विधाको विविधीकरण र खेल पर्यटन प्रवर्धनका लागि सोलुखुम्बु, मुस्ताङ र जुम्लामा हाई अल्टिच्युड स्पोर्ट्स रंगशाला निर्माण हुने छ ।
अन्तर्राष्टिस्तरमै उपलब्धि हासिल गरेको नेपाली क्रिकेटलाई बजेटमा विशेष प्राथमिकतामा दिइएको छ ।
काठमाडौँको मूलपानी क्रिकेट रंगशाला, मोरङको गिरिजाप्रसाद कोइराला रंगशाला, कैलालीको फाप्ला क्रिकेट रंगशाला र रुपन्देहीको सिद्धार्थ क्रिकेट रंगशाला निर्माणका लागि ४२ करोड रुपैयाँ विनियोजन गरिएको छ ।
कीर्तिपुरस्थित अन्तर्राष्ट्रिय क्रिकेट रंगशालाको स्तरोन्नतिका लागि पनि ४० करोड रुपैयाँ छुट्याइएको छ । गत फागुनदेखि त्रिवि क्रिकेट मैदानमा प्यारापिट निर्माण र फ्लड लाइट्स जडान गर्ने कार्य भइरहेको छ ।
यसै गरी त्रिभुवन विश्वविद्यालयमा इन्जिनियरिङ अध्ययन संस्थानबाट गरिने मूल्याङ्नका आधारमा चितवनस्थित गौतम बुद्ध क्रिकेट रङ्गशालामा सिर्जित सम्पत्ति खरिद गर्न ससर्त अनुदानको व्यवस्था भएको छ ।
यसैगरी उपप्रधानमन्त्री पौडेलले सुर्खेतको वीरेन्द्रनगरमा १०औँ राष्ट्रिय खेलकुदको आयोजना गर्न ५४ करोड रुपियाँ विनियोजन गरेका छन् ।
तीन पटक मिति सरेको राष्ट्रिय खेलकुदका लागि गत वर्ष पनि ६० करोड रुपियाँ विनियोजन गरिएको थियो ।
बजेटमा महिला खेलकुद, डोपिङ र पदक विजेता खेलाडीलाई पनि सम्बोधन गरिएको छ ।
अन्तर्राष्ट्रिय खेलकुदमा पदक विजेता नेपाली खेलाडीलाई प्रोत्साहन गरिने र खेलाडी तथा प्रशिक्षकलाई प्रदान गरिँदै आएको प्रोत्साहन भत्तालाई निरन्तरता दिइने कुरालाई बजेटमा समेटिएको छ ।
खेलकुदमा महिला सहभागिता अभिवृद्धि गर्न महिलालक्षित प्रशिक्षण तथा अभ्यास कार्यक्रम सञ्चालन गर्ने तथा उत्कृष्ट महिला खेलाडीका लागि पुरस्कारको विशेष व्यवस्था गरिने उपप्रधानमन्त्री पौडेलले बताए ।
खेलकुदलाई डोपिङमुक्त गर्ने अभियान अन्तर्गत राष्ट्रिय एन्टी डोपिङ एजेन्सी सञ्चालन गर्न पनि आवश्यक बजेट व्यवस्था गरिएको छ ।
जगदेखि नै खेलकुदलाई बलियो बनाउनेतर्फ पनि सरकारले ध्यान पुर्याएको छ । प्रत्येक प्रदेशमा कम्तीमा तीन विद्यालयमा स्पोर्ट्स एकेडेमी सञ्चालन गर्न बजेट व्यवस्था गरेको गरिएको छ ।
