विराटनगर । कोशी प्रदेशको राजधानी विराटनगरमा जारी तेस्रो संस्करणको मनमोहन स्मृति एकदिवसीय क्रिकेट प्रतियोगितामा विभागीय टिम त्रिभुवन आर्मी क्लब फाइनलमा प्रवेश गरेको छ ।
एमएम कप फाउण्डेशनको आयोजनामा पूर्वप्रधानमन्त्री मनमोहन अधिकारीको स्मृतिमा विराटनगरको वैजनाथपुरस्थित गिरिजाप्रसाद कोइराला अन्तर्राष्ट्रिय क्रिकेट रंगशालामा उक्त प्रतियोगिता भइरहेको छ ।
जसअन्तर्गत सोमबार भएको समूह ‘ए’ को अन्तिम लिग खेलमा आर्मीले बागमती प्रदेशलाई ५ विकेटले पराजित गर्दै फाइनलमा स्थान पक्का गरेको हो ।
लगातार दुई खेलमा जित हात पार्दै आर्मीले फाइनलको यात्रा गरेको हो । पहिलो खेलमा एपिएफलाई ३ विकेटले पराजित गरेको थियो ।
जितसँगै आमीले ४ अंक जोडेको छ भने एपिएफले २ खेलमा १ मा जित र १ मा पराजित हुँदै २ अंककासाथ दोस्रो स्थानमा र वागमतीले खेलेको दुवै खेलमा पराजित हुँदै अंकविहीन भयो ।
आइतबार राति वर्षा भएपछि २६ ओभरमा छोट्याएको खेलमा टस हारेर ब्याटिङ गरेको वागमतीले २४ दशमलव ३ बलमा सवै विकेट गुमाई ९६ रनको सामान्य योगफल खडा गरेको थियो ।
बागमतीका कप्तान सिचिन लेखकले २४ रन बनाउँदा प्रतीक श्रेष्ठले १५ रन र आदिल खानले १० रन बनाउनुबाहेक अरू ब्याटरले दोहोरो अंकलाई छुन सकेनन् ।
आर्मीका प्लेयर अफ म्याच नरेन राउदले ६ ओभरमा २७ रन दिएर ५ विकेट लिँदा दुर्गेश गुप्ताले २ विकेट लिए ।
जवाफमा ९७ रनको सामान्य लक्ष्य पछ्याएको आर्मीले १७ दशमलव ३ बलमा ५ विकेट गुमाई लक्ष्य भेट्टाएको थियो ।
आर्मीको जितमा निश्चल क्षेत्रीले ४६ रनको योगदान दिँदा हिमाञ्सु दत्तले १८ रनको योगदान दिए । वागमतीका दयानन्द मण्डलले २ विकेट लिँदा तिलकराज भण्डारी र आदिल खानले १–१ विकेट दिए ।
मंगलबार समूह ‘बी’ को हिलो लिग खेल आयोजक कोशी प्रदेश र नेपाल प्रहरीको पुलिस क्लबबीच हुने आयोजक संस्थाका अध्यक्ष विप्लव घोषले जानकारी दिए ।
