काठमाडौं । ब्राजिलियन लिजेन्ड फुटबलर रोबर्टो कार्लोस नेपाल आइपुगेका छन् । काठमाडौंमा जारी तेस्रो संस्करणको नेपाल सुपर लिग (एनएसएल) हेर्न उनी मंगलबार बिहान नेपाल आइपुगेका हुन् ।
एनएसएलको आयोजक नेपाल स्पोर्ट्स म्यानेजमेन्ट एन्ड इभेन्ट कम्पनीले उनलाई नेपाल भित्र्याएको हो । उनी यसअघि नै नेपाल आउने कार्यतालिका थियो । तर, आकस्मिक बिरामीका कारण कार्लोस पूर्वनिर्धारित समयभन्दा केही ढिला गरेर नेपाल आइपुगेका हुन् ।
सन् २००२ को विश्वकप विजेता डिफेन्डर रोबर्टो कार्लोस एनएसएल लिग हेर्न केही दिनअगावै नेपाल आउने तयारी थियो । तर, अप्रत्याशित परिस्थिति र अचानक स्वास्थ्यमा आएको समस्याका कारण उनी पूर्वनिर्धारित समयमा आउन सकेका थिएनन् ।
तर, मंगलबार दुईदिने विशेष भ्रमणमा काठमाडौं आएका कार्लोस अब त्रिपुरेश्वरस्थित दशरथ रंगशालामा प्रमुख अतिथि बनेर एनएसएलको फाइनल खेल हेर्ने छन् ।
कार्लोस लेफ्टब्याकमा विश्व उत्कृष्ट खेलाडी मानिन्छन् । उनले प्रहार गरेका घुमाउरा फ्रिकिक बलले जाली चुम्दाको क्षणहरू दर्शकहरूले भुल्न सकेका छैनन् ।
एउटा विश्वकप र तीनवटा च्याम्पियन्स लिग जित्न सफल कार्लोस सन् २००२ मा ब्राजिलले विश्वकप जित्दा प्रमुख खेलाडी थिए ।
त्यसअघि सन् १९९८ को विश्वकपको फाइनल खेल्दा पनि उनी टोलीका लागि महत्वपूर्ण खेलाडी थिए । ५१ वर्षीय कार्लोसले ब्राजिलका लागि सन् १९९२ देखि २००६ सम्म १२५ खेलमा १० गोल गर्न सफल भए ।
स्पेनिस क्लब रियल मड्रिड, इटालीको इन्टर मिलानबाट व्यवसायिक फुटबल खेलिसकेका कार्लोस फुटबल इतिहासका सबैभन्दा प्रशंसा गरिएको डिफेन्डरहरूमध्ये एक हुन् ।
फिफा विश्वकप र चार ला लिगा उपाधिहरूसहित दुई दशकभन्दा लामो व्यावसायिक फुटबल खेलका उनले विश्वभरका लाखौँ फुटबल प्रेमीहरूलाई प्रेरित गरेका छन् ।
कार्लोसले छिमेकी मुलुक भारतको दिल्ली डाइनामोस र ओडिसा एफसीबाट समेत व्यवसायिक फुटबल खेलेका थिए । सन् २०१६ मा भने उनले व्यवसायिक फुटबलबाट सन्न्यास लिएका थिए ।
