विराटनगर । कोशी प्रदेश खेलकुद विकास बोर्डले विकास र शान्तिका लागि अन्तर्राष्ट्रिय खेलकुद दिवसको अवसर पारेर एक दिने योगा प्रशिक्षण कार्यक्रम सम्पन्न गरेको छ ।
विराटनगरस्थित बोर्डको कार्यालयमा सोमबार एक दिने योगा प्रशिक्षण कार्यक्रम सम्पन्न भएको हो ।
बोर्डका सदस्य सचिव कृष्ण बस्नेत (पर्शुराम ) ले शरीर तन्दुरुस्त र निरोगी बनाउनु साथै मानसिक स्वास्थ्यका लागि समेत योगा महत्वपूर्ण रहेकोले एक दिने योगा प्रशिक्षण कार्यक्रमको आयोजना गरेको बताए ।
बस्नेतले बालकदेखि वृद्ध सम्मलाई हितकारी हुने योगाको अभ्यास र प्रवर्द्धनमा बोर्डले सक्रियता साथ भूमिका खेल्ने धारणा समेत व्यक्त गरे ।
योगा प्रशिक्षक शिल्पा प्याकुरेलले दिएको प्रशिक्षण कार्यक्रममा कोशी प्रदेश सभाकी उपसभामुख सिर्जना दनुवार, बोर्डकी उपाध्यक्ष बिन्दिया कार्की, विराटनगर महानगरपालिकाकी उपप्रमुख शिल्पा निराला कार्कीलगायत बोर्ड मातहतका कर्मचारीहरू, विभिन्न खेल र खेल सम्बद्ध संघ-संगठनमा आवद्ध खेलकुदकर्मीहरूको उपस्थिति रहेको थियो ।
हरेक वर्ष अप्रिल ६ तारिखमा मनाइने अन्तर्राष्ट्रिय खेलकुद दिवसको अवसरमा बोर्डले आइतबार विराटनगरमा र्यालीसहितको शुभकामना आदानप्रदान कार्यक्रमसमेत आयोजना गरेको थियो ।
