काठमाडौं । साबिक विजेता ललितपुर सिटीले नेपाल सुपर लिग (एनएसएल) मा पहिलो जित आत्मसात् गरेको छ ।
पहिलो खेलमा काठमाडौं रेजर्ससँग दुई गोलको अग्रता जोगाउन नसकेको ललितपुरले आफ्नो दोस्रो खेलमा पोखरा थन्डर्सलाई ३–२ ले पराजित गरेको हो ।
तनावपूर्ण खेलमा जोनाथन कान्टिलानाको दुई गोलसँगै जित निकालेको ललितपुर दुई खेलबाट चार अंक जोड्दै अंकतालिकाको शीर्ष स्थानमा उक्लिएको छ ।
पोखरा भने अझै अंकविहीन छ । पहिलो खेलमा पोखरालाई एफसी चितवनले २–० ले पराजित गरेको थियो ।
ललितपुरलाई जित दिलाउन जोनाथनबाहेक इमोह इजिकेलले एक गोल थपे । पोखराका समीर तामाङ र जोय आइडुले गरेको गोल सान्त्वना रह्यो ।
खेलको ८१औं मिनेटमा पोखराका समीरको क्रसमा कप्तान नवयुग श्रेष्ठले प्रहार गरेको बल ललितपुरका गोलकिपर जेफ्राले उत्कृष्ट बचाउन गरे ।
तर, पोखराका खेलाडीहरूले बलले लाइन पार गरिसकेको भन्दै गोलले मान्यता पाउनुपर्ने अडान राखेका थिए ।
तर, रेफ्री नवीन्द्र महर्जनले गोलको मान्यता दिएनन् । त्यसपछि नवयुग र समीर रेफ्रीसँग विवादमा उत्रिएका थिए ।
त्यहीबेला पोखराका किट पार्टनर जि स्पोर्ट्सका प्रमुख सुन्दर थापा रेफ्रीलाई हात नै हाल्न झम्टिएका थिए ।
उनलाई सम्झाउन एनएसएलका कम्पिटिसन डिरेक्टर सञ्जीव मिश्र नै पुगेका थिए ।
तर, सञ्जीवमाथि नै हातपात भएपछि अवस्था तनावपूर्ण भएको थियो ।
पोखराको अफिसिलय बेन्च लिस्टमा नामसम्म नभएका उनलाई बाहिर निकाल्न सुरक्षाकर्मी प्रयोग गर्नुपरेको थियो ।
इन्जुरी समयको नवौं मिनेटमा जोयले गोल गर्दै पोखरालाई ३–२ को स्थितिमा ल्याए ।
समीरले दिएको पासमा उनले गोल गरेका थिए । तर, समय अभावका कारण त्यसपछि पोखरा खेलमा फर्किन सकेन ।
