विराटनगर । नेपाली युथ फिटनेस एन्ड केलिसथेनिक्स विराटनगरले चौथो संस्करणको कोशी प्रदेश स्ट्रि६ गेम्सको आयोजना गरेको छ ।
कोशी प्रदेश खेलकुद विकास बोर्डको संयोजनमा गत शनिबार सहिद रंगशाला विराटनगरमा खुल्ला व्यायाम प्रतियोगिता सम्पन्न भएको थियो ।
विराटनगर महानगरपालिकाको प्रवर्द्धनमा भएको उक्त प्रतियोगितामा एक सय ३० जना पुरुष खेलाडी र ३० जना महिला खेलाडी गरी जम्मा १६० जना खेलाडी सहभागी थिए ।
जसमा पुरुष सर्किट विधातर्फको खेलमा आयुष नेम्वाङ प्रथम भए भने मुकेश अगुवा र एइनिस प्रधानले द्वितीय र तृतीय स्थान प्राप्त गर्न सफल भए ।
त्यसैगरी, महिला सर्किट विधातर्फको खेलमा महिमा यखा राई प्रथम हुँदा सपना मगर र भावना घिमिरेले क्रमशः द्वितीय र तृतीय स्थान प्राप्त गर्न सफल भए ।
खुल्ला बार विधातर्फको खेलमा साहिल लिबांग,सुशान्त नरसिंह राणा, संजोक थापाले क्रमशः प्रथम, द्वितीय र तृतीय स्थान प्राप्त गर्न सफल भए ।
हरेक विधाअन्तर्गतको खेलमा प्रथम, द्वितीय र तृतीय स्थान हासिल गरेका खेलाडीहरूले एनवाइएफसी विराटनगरको तर्फबाट प्रोत्साहनस्वरूप क्रमशः मेडल, ट्रफीसहित नगद रु १५,०००, रु ९,००० र रु ६,००० नगद पुरस्कर तथा विभिन्न आकर्षक उपहारहरू प्राप्त गरे ।
नेपाली युथ फिटनेस एण्ड केलिसथेनिक्स विराटनगर संस्थाका संस्थापक अध्यक्ष सुमन बन्जाराको अध्यक्षतामा आयोजित उक्त कार्यक्रमको उद्घाटन समारोहमा प्रमुख अथिति विराटनगर महानगर प्रमुख नागेश कोइराला रहेका थिए ।
कार्यक्रमको समापन भने कोशी प्रदेश खेलकुद विकास बोर्डका सदस्य सचिव पर्शुराम बस्नेत र विशिष्ट अतिथि एनवाइएफसीका संस्थापक अध्यक्ष सुकदेव कार्कीलगायतले गरेका थिए ।
