विराटनगर । अर्जेन्टिनाका मुख्य प्रशिक्षक लियोनल स्कालोनीले फिफा विश्वकपअन्तर्गत दक्षिण अमेरिकी छनोट खेल खेल्ने टोलीको नाम सार्वजनिक गरेका छन् ।
सोमबार उनले सार्वजनिक गरेको २५ सदस्यीय टोलीमा अर्जेन्टिनाका स्ट्राइकर तथा स्टार फुटबलर लियोनल मेस्सी समावेश छैनन् ।
मांसपेशी चोटका कारण ३७ वर्षीय फरवार्ड टोलीमा समावेश नभएका हुन् ।
विश्वकप छनोटमा शीर्ष स्थानमा रहेको अर्जेन्टिनाले शुक्रबार दोस्रो स्थानको उरुग्वेसँग खेल्नेछ ।
त्यसको चार दिनपछि मंगलबार अर्जेन्टिनाले ब्युनोस आयर्सस्थित मोनुमेन्टल स्टेडियममा पाँचौं स्थानको ब्राजिलको सामना गर्नेछ ।
अर्जेन्टिनी सञ्चारमाध्यमहरूका अनुसार मेस्सीलाई आइतबार इन्टर मियामीको एट्लान्टा युनाइटेडविरुद्धको २–१ को जितका क्रममा देब्रे थाईमा दुखाइ महसुस भएको थियो ।
तर, अर्जेन्टिनी फुटबल संघले उनको अनुपस्थितिको औपचारिक कारण खुलाएको छैन ।
मेस्सी मात्रै होइन, अर्जेन्टिनाका अन्य महत्त्वपूर्ण खेलाडीहरू पनि यी दुई खेलका लागि अनुपस्थित हुनेछन् ।
पाउलो डिबाला, गोन्जालो मोन्टिएल र जियोभानी लो सेल्सो चोटका कारण टोलीबाहिर छन् ।
मार्च २ मा घोषणा गरेको प्राम्भिक टोलीबाट एलेजान्ड्रो गार्नाचो र क्लाउडियो एचेभेरीलाई पनि प्रशिक्षक स्कालोनीले बाहिर राखेका छन् ।
विश्वकप विजेता मेसीलाई यस सिजनको सुरुआतदेखि नै इन्टर मियामीले चोटको जोखिमका कारण केही खेलमा विश्राम दिएको थियो ।
यो महिना मात्रै मेसीले ह्युस्टन डायनामो, काभालियर एससी र चार्लोट एफसीविरुद्धको खेल गुमाएका थिए ।
उनले काभालियर एससीविरुद्ध कन्काकाफ च्याम्पियन्स कपको अन्तिम १६ को दोस्रो लेगमा भने पुनरागमन गरेका थिए।
तर, प्रशिक्षक जाभियर माश्चरानोकाअनुसार मेस्सी आइतबार एट्लान्टाविरुद्धको खेलका लागि फिट थिए ।
उनले २०औं मिनेटमा गोल गरेका थिए, जुन समयमै उनलाई चोट लागेको बताइएको छ ।
विश्वकप छनोटको अंक तालिकामा अर्जेन्टिनाले १२ खेलबाट २५ अंक जोडेको छ । समान खेलबाट उरुग्वेको २० र ब्राजिलको १८ अंक छ ।
