विराटनगर । पाँचौं संस्करणको मिल्स गोल्डकप फुटबल प्रतियोगितामा उदयपुरको फ्युजन फुटबल क्लब गाईघाट सेमिफाइनलमा पुगेको छ ।
आइतबारदेखि सुरु भएको प्रतियोगिताको उद्घाटन खेलमा सप्तरीको प्रोग्रेसिभ युवा क्लब फत्तेपुरलाई १–० गोलले निराश बनाएको हो ।
मिल्स गोल्डकप फुटबल ट्रष्टको आयोजनामा विराटनगरको जुट मिल खेल मैदानमा भएको खेलमा फ्युजन फुटबल क्लबलाई जिताउन युवराज थापा नायक बने ।
उनले खेलको ६८औँ मिनेटमा गरेको गोल नै निर्णायक साबित भयो । खेलको प्लेयर अफ द म्याच पनि उदयपुरका गोलकिपर अनिल मगर घोषित भए । उनले नगद २ हजार १ सय रुपैयाँ प्राप्त गरे ।
प्रतियोगिताका विजेताले नगद १ लाख १ हजार रुपैयाँ प्राप्त गर्नेछन् भने उपविजेताले ५१ हजार रुपैयाँ पाउनेछन् । आगामी १० गतेसम्म हुने प्रतियोगितामा भारतको एक टिमसहित कोशी प्रदेशका आठ वटा टिमको सहभागिता छ ।
अब, सोमबारको खेल घरेलु टिम पेमा स्पोर्टिङ क्लब विराटनगर र कोशी प्रदेश प्रहरी कार्यालय विराटनगरबीच हुने मिल्स गोल्डकप फुटबल ट्रष्टका अध्यक्ष विष्णु डंगोलले जानकारी दिए ।
प्रतियोगिताको उद्घाटन विराटनगर महानगरपालिकाका प्रमुख नागेश कोइरालाले गरेका थिए ।
