काठमाडौं । राष्ट्रिय क्रिकेट टोलीका कप्तान रोहित पौडेल र सन्दीप लामिछानेसहित पाँच खेलाडी वर्गीकरणको श्रेणी ‘ए’ मा परेका छन् ।
नेपाल क्रिकेट संघ (क्यान) ले बुधबार सार्वजनिक गरेको खेलाडीको नयाँ वर्गीकरणमा पुरुषतर्फ ‘ए’ मा पर्नेमा कप्तान रोहित, सन्दीप, दीपेन्द्रसिंह ऐरी, सोमपाल कामी र आसिफ शेख परेका हुन् ।
यसअघि श्रेणी ‘ए’ मा रहेका करण केसी र कुशल भुर्तेल ‘बी’ मा झरेका छन् । क्यानले खेलाडीलाई ‘ए’, ‘बी’, ‘सी’, राष्ट्रिय र इमर्जिङ गरी तीन श्रेणीमा विभाजन गरी सेन्ट्रल कन्ट्याक्टमा राखेको हो ।
जसअनसार ‘ए’ मा रहने खेलाडीको मासिक तलब एक लाख, ‘बी’ को ७० हजार, ‘सी’ को ५५ हजार, राष्ट्रियको ३५ हजार र इमर्जिङको २५ हजार रुपैयाँ रहेको छ ।
श्रेणी ‘बी’ मा कुशल र करणसँगै गुल्शनकुमार झा, ललितनारायण राजवंशी र अनिकुमार शाह रहेका छन् । अनिल पहिलो पटक श्रेणीमा परेका हुन् ।
यस्तै क्यानले महिलातर्फ ‘ए’ श्रेणीमा कप्तान इन्दु वर्मा, पूजा महतो, रुविना क्षेत्री र सीता रानामगरलाई समावेश गरेको छ ।
महिलातर्फ ‘ए’ मा रहने खेलाडीको मासिक तलब ५०, ‘बी’ को ३५ हजार, ‘सी’ को २५ हजार र ‘डी’ को २० हजार रुपैयाँ रहेको छ ।
