विराटनगर । थ्रीस्टार क्लब ‘डिफेन्डिङ च्याम्पियन’ मच्छिन्द्र एफसीलाई पाखा लगाउँदै विराटनगरमा जारी नवौं संस्करणको विराट गोल्डकप फुटबल प्रतियोगिताको सेमिफाइनलमा प्रवेश गरेको छ ।
सहिद रंगशालामा शुक्रबार राति सम्पन्न तेस्रो क्वार्टर फाइनलमा मच्छिन्द्रको चुनौती २–१ गोल अन्तरले पन्छाउँदै थ्रीस्टार अघि बढेको हो । उसको भेट आइतबारको पहिलो सेमिफाइनल खेलमा विभागीय टोली त्रिभूवन आर्मीसँग हुने छ ।
विराट गोल्डकपको पूर्वविजेता थ्रीस्टारको जितमा आशिष चापागाईं र दिपेश घलेले १–१ गोल गरे ।
खेलको १५ औं मिनेटमा एन्जल महर्जनको सहयोगमा आशिषले टिमलाई अग्रता दिलाए ।
डी–बक्सभित्रबाट गरेको प्रहारले पोस्टको बाटो तय गरेको थियो ।
त्यसको १० मिनेटमै दिपेशले अग्रता दोब्बर बनाए । थ्रीस्टारलाई जित निकाल्न आशिष र दिपेशले गरेको गोल पर्याप्त भयो ।
मच्छिन्द्र पनि अन्तिमसम्म संघर्षमै रहयो । खेलको अन्त्यतिर ८९ औं मिनेटमा कप्तान देवेन्द्र तामाङले सान्तवना गोल फर्काए ।
उनले डी–बक्स भित्रबाट टाउकोले आकर्षक गोल गरेका थिए । अर्को गोल थप्न नसक्दा मच्छिन्द्र फर्कियो ।
खेलको म्यान अफ दी म्याच थ्रीस्टारका दिपेश घलेले नगद ११ हजार पाए ।
पहिलो हाफमा २ गोलले पछि परेसँगै मच्छिन्द्र दबाबमा परेको थियो । मध्यान्तरपछि आक्रमक बने पनि जित निकाल्न सकेन ।
थ्रीस्टारले बुधबार दोस्रो मुख्यमन्त्री कपिलवस्तु तिलौराकोट गोल्कडप फुटबल प्रतियोगिताको फाइनलमा हारेको बदला पनि विराट गोल्डकपबाट लिएको छ ।
कपिलवस्तु गोल्डकपको फाइनलमा थ्रीस्टारलाई मच्छिन्द्रले १–० गोलले पराजित गरेको थियो ।
दास्रो हाफपछि केही उत्कृष्ट अवसर सिर्जना गरे पनि मच्छिन्द्र सफल भएन ।
खेलको ५५ औं मिनेटमा देवेन्द्र तामाङको प्रहारलाई गोलरक्षक विवेक मगरले विफल पारिदिए ।
त्यसलगतै थ्रीस्टारका विदेशी खेलाडी एन्ड्रिस असफल भए ।
८० औं मिनेटमा थ्रीस्टारका युसुफले करिब २५ यार्डदेखि गरेको सशक्त प्रहार बाहिरियो ।
मच्छिन्द्र घरेलु टिम सांग्रीला मोरङ एफएलाई २–० गोलले हराउँदै विराट गोल्डकपको आठौं संस्करणमा विजेता बनेको थियो ।
थ्रीस्टारले पाँचौं संस्करण जितेको थियो । शनिबारको अन्तिम क्वार्टर फाइनल खेलमा चर्च ब्वाईज युनाईटेड र एनआरटी भिड्ने छन् ।
