विराटनगर । विराटनगरमा कोशी क्रिकेट महोत्सव २०२५ सम्पन्न भएको छ ।
कोशी प्रदेश क्रिकेट संघको प्रवर्द्धन तथा नेपाल क्रिकेट फाउण्डेशनको आयोजनामा एमसिसि फाउण्डेशन र क्रिकेट विथ आउट बाउन्ड्रिजको समन्वयमा तथा मोरङ जिल्ला क्रिकेट संघको सहयोगमा भएको महोत्सव आज समापन भएको छ ।
विराटनगर ६ स्थित मेरिलबोन विराटनगर ज्वाला क्रिकेट ग्राउण्डमा भएको कोशी क्रिकेट महोत्सव नेपाल क्रिकेट फाउण्डेशनको निरन्तर प्रयासअन्तर्गत उक्त महोत्सव भएको हो ।
भुँइतहमा क्रिकेटको विकास र प्रवर्द्धन र विद्यालयस्तरीय खेलाडीहरूलाई प्रतिस्पर्धात्मक वातावरणमा खेल्ने अवसर प्रदान गर्दै उदीयमान प्रतिभाहरूको पहिचान गर्ने उद्देश्यले आयोजना गरिएको फाउण्डेशनका अध्यक्ष अविशेक श्रेष्ठले बताए ।
विद्यालय क्रिकेटलाई सशक्त बनाउने महिला खेलाडीहरूलाई क्रिकेटमा समान अवसर दिने र युवा खेलाडीहरूलाई पेशागत क्रिकेटतर्फ आकर्षित गर्ने यस प्रतियोगिताको मुख्य लक्ष्य भएको अध्यक्ष श्रेष्ठले बताए ।
यो प्रतियोगितामा विराटनगरका आदर्श बालिका, श्री आदर्श मावि, जनपथमावि, श्री माध्यमिक मावि, विराट बहिरा मावि र सुशिक्षा निकुञ्ज गरि ६ वटा सामुदायिक विद्यालयको सहभागिता रहेको थियो ।
विद्यालय स्तरीय प्रतियोगिताअन्तर्गत केटा र केटी दुवै तर्फका प्रतियोगिताहरू सञ्चालन गरिएको हरेक खेल १० ओभरको खेलाइएको थियो ।
क्रिकेट विथआउट बाउन्ड्रिजका स्वयंसेवकहरूले सहयोग गरेका थिए ।
