विराटनगर । आसन्न नवौं संस्करणको विराट गोल्डकप फुटबल प्रतियोगिताको खेलतालिका सार्वजानिक भएको छ ।
‘पूर्वको सान’ मानिने विराट गोल्डकपको नवौं संस्करण फागुन १९ गतेदेखि २८ गतेसम्म आयोजना हुँदैछ ।
विराटनगर सहिद रंगशालामा फ्लडलाइट्सको माध्यमबाट हुने रात्रीकलीन प्रतियोगिताको उद्घाटन फागुन १९ गते हुँदै छ ।
उक्त खेलका लागि आयोजक विराट गोल्डकप ट्रस्टले तालिका सार्वजनिक गरेको हो ।
जसअनुसार उद्घाटन खेलमा विभागीय टिम त्रिभुवन आर्मी क्लब र पाहुना टोली भारत कोलकाताको साउथर्न समिति फुटबल क्लबबीच हुने भएको छ ।
अघिल्लो संस्करणमा आर्मी क्वार्टरफाइनलबाट अगाडि बढ्न सकेको थिएन ।
यसैगरी, यस संस्करणको दोस्रो खेलमा फागुन २० गते सशस्त्र प्रहरी बल (एपीएफ) र सुदेभा दिल्ली फुटबल क्बल भारतबीच हुनेछ ।
त्यसैगरी फागुन २१ गते पहिलो क्वार्टरफाइनल खेल हुने भएको छ । पहिलो क्वार्टरफाइनल खेल आयोजक रिजालको मोरङ ११ र उद्घाटन खेलका बिजेता टिमसँग प्रतिस्पर्धा गर्नेछ ।
फागुन २२ गते दोस्रो क्वार्टरफाइनल खेल हुनेछ । नेपाल पुलिस क्लबले बाइ पाएको छ ।
सशस्त्र प्रहरी बल (एपीएफ) र सुदेभा दिल्ली फुटबल क्बलको बिजेता टिमसँग पुलिसले सेमिफाइनल यात्राको लागि प्रतिस्पर्धा गर्नेछ ।
फागुन २३ गते मच्छिन्द्र र थ्रीस्टार बीच हुनेछ भने फागुन २४ गते चर्च व्याइज फुटबल क्लब काठमाडौं र एन आरटी क्लब काठमाडौंबीच हुनेछ ।
फागुन २५ र २६ गते सेमिफाइनल खेल हुनेछ भने एक दिन ग्याप राखेर फागुन २८ गते फाइनल हुनेछ ।
प्रतियोगितामा विदेशी दुई टिमसहितका स्वदेशी ‘ए’ डिभिजनका १० टिमको सहभागिता रहेको छ ।
