विराटनगर । इंग्लिस प्रिमियर लिगको शीर्ष स्थानमा रहेको लिभरपुल अप्रत्याशित हार बेहोर्दै एफए कपबाट बाहिरिएको छ ।
आइतबार एफए कपको चौथो चरणमा प्लेमाउथसँग १–० को स्तब्धकारी हार भोग्दै लिभरपुल बाहिरिएको हो ।
योसँगै लिभरपुलको यस सिजनमा चार वटा प्रमुख उपाधि जित्ने सपना पनि अन्त्य भएको छ ।
लिभरपुलले प्रिमियर लिगमा एक खेल कम खेल्दै तालिकामा ६ अंकको अग्रता लिएको छ ।
दोस्रो स्थानको आर्सनलको भने २४ खेलबाट ५० अंक छ ।
लिभरपुलले च्याम्पियन्स लिगको पहिलो चरण शीर्ष स्थानमा रहेर समाप्त गरेको छ र इङ्लिस लिग कपको फाइनलमा स्थान बनाइसकेको छ ।
दोस्रो श्रेणीको क्लब प्लेमाउथका रायन हार्डीले खेलको ५३औं मिनेटमा पेनाल्टीमार्फत निर्णायक गोल गर्दै आफ्नो टोलीलाई अप्रत्याशित जित दिलाए ।
दक्षिण–पश्चिम इङ्ग्ल्यान्डस्थित प्लेइमाउथ क्लब दोस्रो श्रेणी च्याम्पियनसिपको पुछारमा छ र हालै म्यानचेस्टर युनाइटेड पूर्वखेलाडी वायन रुनीलाई प्रशिक्षक पदबाट बर्खास्त गरेको थियो ।
च्याम्पियनसिपमा प्लेमाउथले ३० खेलबाट २५ अंक बटुलेको छ ।
लिभरपुलले मोहम्मद सालाह, कोडी गाक्पो र भर्जिल भान डाइकजस्ता स्टार खेलाडीबिना अत्यधिक परिवर्तन गरिएको टोली मैदानमा उतारेको थियो, जसको कारण यस हारको सामना गर्नुपर्यो ।
