विराटनगर । निजी तथा आवासीय विद्यालय अर्गनाइजेशन नेपाल मोरङले माघ १८ गतेदेखि १४औं संस्करणको प्याब्सन स्पोट्र्स मिट गर्ने भएको छ ।
मंगलबार प्याब्सन मोरङको कार्यालयमा पत्रकार सम्मेलन गरी १८ गतेदेखि २० गतेसम्म विराटनगरका विभिन्न मैदानहरूमा प्रतियोगिता आयोजना गर्ने जानकारी दिइएको हो ।
तीन दिनसम्म हुने प्रतियोगितामा जिल्लाभरिका २ सय १० वटा प्याब्सनमा आबद्ध सदस्य विद्यालयबाट ३ हजार बढी विद्यार्थीहरूले २५ वटाभन्दा बढी प्रतियोगितामा भाग लिनेछन् ।
२०६३ सालदेखि प्रत्येक वर्ष हुँदै आएको प्रतियोगितालाई यसपटक केही परिमार्जित गर्दै २५ विधामा स्पर्धा गराउन लागिएको हो ।
यसअघि दुई दर्जन ‘इभेन्ट’ मा खेलकुद गराएको स्मरण गराउँदै प्याब्सन मोरङका अध्यक्ष जगतबहादुर बस्नेतले आगामी संस्करणमा झन् बढी विधामा स्पर्धा गराउने लक्ष्य लिइएको सुनाए ।
प्याब्सन स्पोट्र्स मिटमा कक्षा १० सम्मका छात्र र छात्रातर्फ गरी मैदानमा खेलाइने लङ जम्प, हाई जम्प, ट्रिपल जम्प, सर्ट पुट र जेभलिन थ्रो का स्पर्धा हुनेछन् । यस्तै सोही कक्षाका फिल्ड इभेन्टमा भलिबल, टेबल टेनिस र फुटबल यू–१५ का स्पर्धाहरू हुनेछन् ।
ट्रयाक इभेन्टतर्फ कक्षा १० सम्म छात्र र छात्राहरूको अलग–अलग १ सय मिटर, २ सय मिटर, ४सय मिटर, ८ सय मिटर, १५ सय मिटर दौड हुनेछ ।
यसैगरी सय गुणा ४ मिटर रिले दौड र ४ सय गुणा ४ मिटर रिले दौडका स्पर्धा हुने प्याब्सन मोरङले जनाएको छ ।
कक्षा ११ र १२ का विद्यार्थीहरूको लागि भने छात्रतर्फ भलिबल, फुटबल, टेबल टेनिस, बास्केटबल र म्याराथनका स्पर्धा हुनेछन् भने छात्रातर्फ भलिबल, टेबल टेनिस र म्याराथनका स्पर्धाहरू हुने छन् ।
कक्षा ११ र १२ मा हिसान खेल सप्ताहमा सहभागी स्कुलले भने सहभागी हुन पाउनेछैनन् ।
प्रतियोगितामा विजेताहरूलाई मेडल तथा ट्रफी प्रदान गरिने आयोजकले जनाएको छ ।
कोशी प्रदेश सरकारका सामाजिक विकास मन्त्री पाँचकर्ण राईले उद्घाटन गर्ने स्पोर्ट्स मिटका खेलहरू सहिद मैदान, विराटनगर जुटमिलको खेलमैदान र एभरेस्ट कलेजको खेलमैदानमा हुनेछन् ।
प्रतियोगिता सम्पन्न गर्न करिब १५ लाख रुपैयाँ खर्च हुने अनुमान गरिएको छ । उक्त लागत सहभागी विद्यालयलहरूको रजिस्ट्रेसन शुल्का साथै प्याब्सनको आन्तरिक स्रोतबाट व्यवस्थापन हुने बताइएको छ ।
