ओखलढुंगा । किक बक्सिङ अन्तर्राष्ट्रिय प्रतियोगितामा सहभागी बन्नका लागस चन्दा उठाएर भारत जानुपर्ने बाध्यता आइपरेको छ ।
सुनकोशी गाउँपालिका–४ ओखलढुंगाका २४ वर्षीय चिरण राईले भारतको नयाँ दिल्लीमा हुने प्रतियोगितामा सहभागी हुन लाग्ने खर्च आफैँले व्यहोर्नु पर्ने भएको हो ।
किक बक्सिङका खेलाडी राईले चन्दा संकलन गरेर अन्तर्राष्ट्रिय प्रतियोगितामा सहभागी हुने तयारी गरेका हुन् ।
सन् २०२५ फेब्रुअरी १ देखि ५ तारिखसम्म भारतमा हुन गइरहेको प्रतियोगितामा सहभागी हुन आर्थिक संकलन थालेका हुन् ।
राई नेशनल किक बक्सिङ एसोसिएसनमार्फत सिंगो नेपलको प्रतिनिधित्व गर्दै फोर्थ वाको इन्डिया खुला अन्तर्राष्ट्रिय किक बक्सिङ प्रतियोगितामा सहभागी हुन लागेका हुन् ।
खेलमा सहभागी हुन एक लाख खर्च लाग्ने एसोसिएसनले जनाएको छ ।
काठमाडौं–दिल्ली–काठमाडौं हवाई टिकट ३० हजार, छ दिनको खाना र बसोबासको ६० हजार साथै प्रवेश शुल्क दश हजार गरी एक लाख खर्च लाग्ने छ ।
एसोसिएसनले सुनकोशी गाउँपालिकालाई पत्र पठाएर राईलाई आर्थिक सहयोग गर्न भनेको छ ।
गाउँपालिकाले राईलाई पर्याप्त आर्थिक सहयोग नगर्ने भएको छ । पालिका मार्फत ३० हजार आर्थिक गरिने सुनकोशी गाउँपालिका अध्यक्ष कमल तामाङले बताए ।
राईलाई प्रतियोगितामा सहभागी गराउन वडा कार्यालयले आर्थिक संकलन अभियान थालेको छ ।
राई किक बक्सिङका अब्बल एवम् पदक दावेदार खेलाडी भएकाले आर्थिक सहयोगका लागि आह्वान गरिएको वडा अध्यक्ष टायान्द्र राईले बताए ।
