विराटनगर । मलेसियामा जारी आइसीसी महिला यू-१९ टी ट्वान्टी विश्वकपमा नेपालले सोमबार स्कटल्यान्डसँग प्रतिस्पर्धा गर्दै छ ।
वाइएसडी युकेएम क्रिकेट ओभलमा खेल नेपाली समय अनुसार दिउँसो सवा १२ बजेबाट सुरु हुनेछ ।
आफ्नो पहिलो खेलमा पराजित दुवै टोली पुनरागमनको प्रयासमा हुनेछन् ।
नेपाल पहिलो खेलमा बंगलादेशसँग ५ विकेटले पराजित भएको थियो ।
सो खेलमा बंगलादेशले टस जितेर पहिला फिल्डिङ रोजेपछि नेपालले सुरु ब्याटिङ गरेको थियो ।
१८ ओभर २ बल मात्र पिचमा टिक्न सकेको नेपालले केवल ५२ रन बनाएको थियो ।
सो खेलमा नेपालको ‘रनिङ बिट्विन द विकेट’ निकै खराब रहँदा ५ खेलाडी रन आउट भएका थिए ।
जवाफमा नेपालले राम्रो बलिङ गरे पनि ५२ रनको सामान्य योगफल रक्षा गर्न पर्याप्त भएन ।
टिमले आज अघिल्लो खेलमा गरेका गल्ती सुधार्न आवश्यक छ ।
प्रशिक्षक महेश रिजालले कप्तान पूजा महतोबाट राम्रो प्रदर्शनको अपेक्षा गरेका छन् ।
उपकप्तान सोनी पाख्रिन पनि चल्नु आवश्यक छ ।
समूहको अन्तिम खेलमा नेपालले अस्ट्रेलियासँग खेल्नु पर्ने हुँदा यो खेलमा हार बेहोरे नेपाल बाहिरिने खतरा रहेको छ ।
अर्को तर्फ स्कटल्यान्ड, अस्ट्रेलियासँग ९ विकेटले पराजित भएको थियो ।
५९ रनमा अलआउट भएको स्कटल्यान्डलाई पराजित गर्ने क्रममा अस्ट्रेलियाले १५ ओभर १ बलमा केवल १ विकेट गुमाएको थियो ।
पुनरागमनको प्रयासमा रहेका दुई टोली पहिलो पटक एकअर्का विरुद्ध मैदान उत्रिन लागेका हुन् ।
समूह ‘डी’मा दुवै टोली अंकविहीन छन् ।
नेपाल नेट रन रेटको आधारमा तेस्रो र स्कटल्यान्ड पुछारमा छ ।
२ अंक सहित अस्ट्रेलिया शीर्ष स्थानमा छ भने समान अंक जोडेको बंगलादेश दोस्रो स्थानमा छ ।
हरेक समूहबाट तीन टोली सुपर सिक्समा प्रवेश गर्ने हुँदा यस खेलमा जित हात पार्ने टोली अघिल्लो चरणमा पुग्ने सम्भावना उच्च हुनेछ ।
विश्वकपमा यस बाहेक आज अन्य ५ खेल पनि हुँदै छ ।
