विराटनगर । सप्तरीको छिन्नमस्ता गाउँपालिकामा नेपाल प्रिमियर लिग (एनपिएल) को विजेता जनकपुर बोल्ट्स टिमलाई सम्मान गरिएको छ ।
विशेष कार्यक्रमबीच छिन्नमस्ता गाउँपालिकामा काठमाडौंमा हालै सम्पन्न प्रथम संस्करणको एनपिएल जित्ने जनकपुर टिमलाई सम्मान गरिएको हो ।
छिन्नमस्ता शक्तिपीठमा पूजाअर्चना र देवीको आशीर्वाद ग्रहणपछि गाउँपालिकाका अध्यक्ष विद्यानन्द चौधरीले उनीहरूलाई सम्मान गरेका हुन् ।
अध्यक्ष चौधरीले टिमका ओपनर उत्सव सिग्देल, क्याप्टेन ललित राजवंशी र अन्य खेलाडीहरूलाई १ लाख ५ हजार रुपैयाँको पुरस्कार, कदरपत्र, मधेसको पहिचान झल्काउने गम्छा र मिथिलाको पाग पहिराएर सम्मान व्यक्त गरे ।
चौधरीले टिमलाई धन्यवाद दिँदै भने, ‘यो सानो योगदानले खेलाडीहरूमा ऊर्जा र आत्मबल थप्ने विश्वास छ । जनकपुर बोल्ट्सको सफलताले देशभरका युवालाई खेलकुदप्रति आकर्षित गर्नेछ ।’
कार्यक्रममा अध्यक्ष चौधरीले जनकपुर बोल्ट्सको प्रेरणादायी यात्राको प्रशंसा गर्दै, नेपाल प्रिमियर लिगले नेपाली खेलकुदलाई नयाँ उचाइमा पुर्याएकोमा गर्व व्यक्त गरे ।
उनले भने, “नेपाल प्रिमियर लिगले केवल खेलकुदको मनोरञ्जनमात्र प्रदान गरेको छैन, यसले राष्ट्रिय एकता, युवाको प्रेरणा, र खेलकुदलाई जीवन परिवर्तन गर्ने माध्यमका रूपमा प्रस्तुत गरेको छ । यो लिगले नेपाली खेलकुदका लागि नयाँ मार्ग प्रशस्त गरेको छ ।”
अध्यक्षले खेलकुदको विकास र खेलाडीहरूको सशक्तीकरणका लागि राज्यले अझ धेरै पहल गर्नुपर्ने आवश्यकता औंल्याउँदै भने, “नेपाल सरकारले खेलाडीहरूको जीवनमा आर्थिक अभाव नहोस् भनेर थप ध्यान दिनुपर्छ । उनीहरूको पारिश्रमिक वृद्धि गर्दै, खेलकुदलाई दीर्घकालीन प्रगतिका लागि महत्त्वपूर्ण आधार बनाउन जरुरी छ । खेलकुदले मात्र होइन, यसले युवाको भविष्य र देशको पहिचानलाई पनि बलियो बनाउँछ ।”
क्याप्टेन ललित राजवंशीले छिन्नमस्ता गाउँपालिकाको यो सम्मानले आफूहरूलाई थप जिम्मेवारी महसुस गराएको बताउँदै भने, “देवीको आशीर्वाद र गाउँपालिकाको यो सम्मानले हाम्रो टिमलाई अझ राम्रो प्रदर्शन गर्न प्रेरित गरेको छ । यो जीतले देशभरका युवालाई खेलकुदमा सक्रिय बनाउने र नेपाली क्रिकेटलाई नयाँ उचाइमा पुर्याउनेछ ।”
छिन्नमस्ता गाउँपालिकाले सम्मान कार्यक्रममार्फत खेलकुदको महत्त्व र यसको माध्यमबाट राष्ट्रिय प्रगति र सामाजिक एकतालाई बलियो बनाउने प्रयासलाई थप प्रोत्साहन दिएको छ ।
यस कार्यक्रममा छिन्नमस्ता गाउँपालिकाका वडा नम्बर ३ का अध्यक्ष विजयकुमार यादवले खेल र खेलाडीहरूप्रति आफ्नो सम्मान व्यक्त गर्दै खेलाडीहरूलाई प्रेरणादायी शब्दहरू प्रस्तुत गरेका थिए ।
