विराटनगर । कोशी प्रदेशको राजधानी विराटनगरमा आगामी फागुन दोस्रो सातादेखि ‘सुपर जेनेरल कर्पोरेट Crik-8’ हुने भएको छ ।
विराटनगर महानगरपालिका-७ सहिद मैदानमा आउँदो फागुन १३ गतेदेखि १७ गतेसम्म ‘कर्पोरेट Crik-8’ हुन आँटेको हो ।
दुबईको इलेक्ट्रोनिक्स ब्रान्ड सुपर जेनेरलको मुख्य प्रायोजन र अल्फा स्पोर्ट्सको आयोजनामा पहिलोपटक कर्पोरेट Crik-8 प्रतियोगिता हुन लागेको हो ।
नेपालभरिका विभिन्न उद्योगभित्रका क्रिकेट प्रतिभाले भरिपूर्ण खेलाडीहरू समाहित १६ टोलीले सहभागिता जनाउने उक्त प्रतियोगिता आठ ओभरको हुने छ ।
यसैले यसको नाम ‘क्रिके-8’ राखिएको आयोजक संस्था अल्फा स्पोर्ट्सका प्रबन्ध निर्देशक शोरेज राज वन्तले जानकारी दिए ।
यस प्रतियोगिता आयोजनाका निम्ति बिहीबार सुपर जेनेरलको नेपालका लागि एकमात्र आधिकारिक विक्रेता रहेको डिइई इन्टरनेसनलका प्रबन्ध निर्देशक देवासिस गोल्छा र अल्फा स्पोर्ट्सका प्रबन्ध निर्देशक वन्तले सम्झौतापत्र आदानप्रदान गरेका छन् ।
सम्झौतापत्रमा हस्ताक्षर गर्दै युवा उद्योगी देवासिस गोल्छाले उद्योगभित्र लुकेर रहेका प्रतिभा प्रष्फोटनका लागि यो प्रतियोगिता उत्कृष्ट सावित हुनेमा आफू विश्वस्त रहेको सुनाए ।
यसैगरी, अल्फा स्पोर्ट्सका प्रबन्ध निर्देशक वन्तले साँझ ५ बजेदेखि आयोजना हुने प्रतियोगिता नयाँ ढाँचामा सञ्चालन हुने सुनाए ।
उनका अनुसार १६ टिमलाई विभिन्न चार समूहमा विभाजन गरी लिग चरणका खेल हुने छन् भने समूहका दुई शीर्ष टिम क्वार्टरफाइनलमा प्रवेश गर्ने .छन् ।
टेनिस बलको प्रयोगमा हुने प्रतियोगितामा एउटा खेलाडीले अधिकतम् दुई ओभर बलिङ गर्न पाउने छन् । हरेक टिममा १० खेलाडी हुने छन् ।
आठ ओभरकोमात्र भएका कारण करिब ४५ मिनेटमा एउटा खेल सकिने छ । लिग चरणमा एकै दिन पाँच वटासम्म खेल खेलाइने छन् ।
लिग चरणका २४, क्वार्टरफाइनलका चार, सेमिफाइनलका दुई, तेस्रो स्थानका लागि एक र फाइनलमा एक गरी ३२ वटा खेल हुने छन् ।
प्रतियोगितामा सहभागी बन्ने टिमले र पुरस्कार भने चाँडै नै सार्वजनिक गर्ने आयोजकको तयारी छ । खेलको भिडिओ प्रत्यक्ष प्रसारण गर्ने तयारी पनि आयोजकको छ ।
