विराटनगर । कर्णाली याक्सले काठमाडौंमा जारी पहिलो संस्करणको नेपाल प्रिमियर लिग (एनपिएल) को दोस्रो क्वालिफायरमा स्थान पक्का गरेको छ ।
बुधबार भएको एलिमिनेटर खेलमा चितवन राइनोजलाई २१ रनले पराजित गर्दै कर्णालीले दोस्रो क्वालिफायरमा स्थान सुरक्षित गरेको हो ।
अब कर्णालीले फाइनल प्रवेशका लागि सुदूरपश्चिम रोयल्स र जनकपुर बोल्ट्सबीचको क्वालिफायर १ को विजेतासँग प्रतिस्पर्धा गर्नेछ ।
कीर्तिपुरस्थित त्रिवि क्रिकेट मैदानमा भएको खेलमा कर्णालीले प्रस्तुत गरेको १७५ रनको लक्ष्य पछ्याउन असफल चितवनले १४६ रन मात्रै बनाउन सक्यो ।
चितवनले १७५ रनको लक्ष्य पछ्याउने क्रममा सम्हालिएको सुरुआत गर्न सकेन। पहिलो ओभरको पाँचौं बलमा हसन इसाखिल एक रनमै गुल्शनकुमार झाको हातमा क्याच आउट भएपछि चितवनले लगातार विकेट गुमाउँदै दबाबमा पर्यो ।
पहिलो पावरप्लेमा चितवनले ४७ रन जोड्दा तीन प्रमुख ब्याटर गुमाइसकेको थियो। विपिन रावलले १८ र ल्युक बेन्केनस्टेनले १६ रन बनाएर आउट भए ।
कप्तान कुशल मल्ल र रवी बोपाराले चौथो विकेटका लागि ३६ रनको साझेदारी गर्दै टोलीलाई खेलमा फर्काउने प्रयास गरे । तर, कुशल २१ रनमै बोल्ड भएपछि चितवनको दबाब झन् बढ्यो ।
रवीले ३४ बलमा तीन चौका र चार छक्कासहित ५३ रन बनाएर उत्कृष्ट प्रदर्शन गरे । तर, उनले पनि टोलीलाई जित दिलाउन सकेनन् ।
अन्य ब्याटर सन्तोष कार्की, सोहेल तनवीर, र अमर रौटेलले दोहोरो अंकको स्कोर बनाउन असफल भए, जसले चितवनको यात्रा समाप्त गर्यो ।
बलिङतर्फ कर्णालीका जिशन मक्शूद सर्वश्रेष्ठ रहे । उनले चार ओभर बलिङ गर्दै तीन विकेट लिए ।
सोमपाल कामी र नन्दन यादवले समान दुई विकेट लिए भने विपिन शर्माले एक विकेट हात पारे ।
यो जितसँगै कर्णाली याक्स उपाधि होडका लागि अझै दौडमा रहँदै महत्त्वपूर्ण अवस्थामा पुगेको छ ।
त्यसअघि विलियम बसिस्टो र जयकिशन कोल्सावालाको अर्धशतकसँगै कर्णालीले निर्धारित २० ओभरमा ६ विकेटको क्षतिमा १७५ रन बनाएको थियो ।
तर, कर्णालीको सुरुआत ठिकठाकै रहे पनि पावरप्ले भित्र नै दुई विकेट गुमाउँदै ४९ रनमात्र बनाउन सफल भयो ।
ओपनर ऋत गौतम खाता नै नखोली आउट भए भने तेस्रो नम्बरमा आएका जिशन मक्शूद १२ बलमा एक चौका र एक छक्कासहित १४ रन बनाएर रञ्जित कुमारबाट क्याच आउट भए ।
कर्णाली दबाबमा परेको अवस्थामा जयकिश र बसिस्टोले तेस्रो विकेटका लागि ५९ रनको महत्त्वपूर्ण साझेदारी गर्दै टोलीलाई खेलमा फर्काए ।
जयकिशनले ३९ बलमा ५३ रन बनाउँदै १२.४ ओभरमा शरद भेष्वाकरको बलमा क्याच आउट भए। उनको इनिङ्समा ६ चौका र २ छक्का प्रहार भए ।
गुल्शनकुमार झा क्रिजमा आउनासाथ शून्य रनमा आउट भए पनि बसिस्टोले आफ्नो उत्कृष्ट प्रदर्शन जारी राख्दै प्रतियोगिताको दोस्रो अर्धशतक पूरा गरे ।
उनले ३९ बलमा ३ चौका र २ छक्कासहित ५२ रन बनाए । बसिस्टो अन्तिमतिर सोहेल तनवीरको बलमा बोल्ड भए ।
तर, त्यसअघि उनले चाड्विक वाल्टनसँग ६७ रनको अर्को महत्त्वपूर्ण साझेदारी गरे ।
वाल्टनले २३ बलमा ४ चौका र ३ छक्का प्रहार गर्दै अविजित ४६ रन बनाए, जबकि देव खनालले तीन रनको योगदान गरे ।
चितवनका बलरहरूमध्ये सोहेल तनवीरले ४ ओभरमा २४ रन खर्चेर २ विकेट लिए । शरद भेष्वाकर, कुशल मल्ल, र रवी बोपाराले समान १/१ विकेट लिए ।
चितवनले क्वालिफायर २ पुग्न १७६ रनको लक्ष्य पूरा गर्नुपर्नेछ ।
